اوھرکن گولو اژدار

کافر پشاڑو بابو زمانو ای خور اشلوغ مه کارہ شیر۔ کار کورور!۔

یارخونو میراگرامو گولی توری نسوتے اوھرکن رینی۔ ہتے سورہ فوجوتے اوھرکن گول رینی۔ اوھرکن گولہ ای ہاݰ ژندار پیدا بِرو برائے کی گولو بیلی بکو رویَن ݰوھرت کوراک برائے۔ گولو بیلی زمینہ کِݰ الیکو ریݰوان سو کِݰاکو ای میتی ݰوھرت/ ݰوخت کوراوا استائے۔ ہیغین اوھرکَنو توری نس غیراباد بہچِرو برائے وا اوھر گولتو ہائے الیک یا غاری بِک ختم برو برائے۔۔

کافر پشاڑ تان دیہو روین برارگینیان مݰکی راردو کی ہیہ ژندار ہیہ دیہوتین لوٹ خطرہ ہوئے۔ ہو مریکا غیر ہیہ را  زندہ حال بین نو بوئے۔ مہراکو روئے راردو کی ہو مریسی کیچہ کوری ؟ تھویک، کھونگیر، درون ہو نو مریر۔ 

کافر پشاڑ راردو کی ہو مریکو ای طریقہ شیر۔ آوا جو جم جم ریشوان گولو بلتو ݯھترہ التی کِش باتِم۔ ھ أژدار مه اوچے ریݰوان ݰوخت کوروئے۔ آوا ہو خویانو غیری ہو اندریلاون چھِنم۔ ہیس کورہ بیی کی ٹھور ہوئے تھ پسہ ݰاوار ݰاو ہو خویانو اتریݯی مه یی نیزور۔ مقرار وختہ کافر پشاڑ بابا تان شوقو ڈنگ سِمینو بوتی۔ جو پتہ دیرو محمودی کورین  میہو دتی، ریشوان نست کوری ݯھترہ التی کݰ بوتِک برابار ہتے أژدار یو گتی کافر پشاڑو چے تو ریشوان کِݰینی یوزونن اہیی ݰوخت کوری اسور۔ کافر پشاڑ ہتو خویانو غیری ہتے محمودی کوتیران سورہ ھ ویلٹی ہیہ ویلٹی اژدارو شنگوران، ہردیو، ݰیغون میغنن چھیرکی اسور۔ کندور مودہ بوئے ہسے معلوم نیکی ہتے اژدار ٹھور بتی اسور۔ روئے ہتو پوشی بوہتی شاؤ تو پھت کوکو نو بتی اسونی۔ پھُک ملالہ ہتو اتریݯی کافر پشاڑو یی نے آسونی کی ہتو ژان ہتو شیر۔ تو دورہ تریکو بھرتی اسور۔ 

میراگرامو بو جونن سو ہیہ بارا لوا ݯوکِکو ہتیت ہیہ قصو صدیق و ارینی۔ ہتے اژدارو موجوستیو کھوڑ بو اچہ پت شیرائے۔ پائے ہتے اندریتو بی چھَنی کوراو استانی۔