اسیرو زندگی 7
نالائق ڈق: جوو جماعتہ گیتی خوشان تھ ہوتم مگر مشور کھوار متلو مطابقہ"بیردو کفنوسو خوشان گورو عذبار کیہ خبار" اوہ دی جوا بغاتم رے ݯھئیو جوو جماعتو عذبار خبار نو اوشتم۔" کیہ وت کہ جوا ہاتم تھہ دنیا مہ سوری پرائی۔ اردوو ای کاٹکو دی اُسنیکو ن نو بیتم۔ مہ جماعتی ڈق مہ سار سف جم اوشونی۔ سردار خان و چے زار خان مہ یاریری نہ بہی اوشونی۔ جنان اوچ ژانو خان مہ سار جم اوشونی۔ جوو ھ سال دی چارغیریوچ پڑینجو موژی کوسی پورہ بتی یومونو چھٹی ہوئے۔ اسکولو گوݯو پڑیج رے جنالی شاور۔ مہ دورار اسکولوتے تروئے میل اوشوئے۔ پونگی ݯاکونو گریݰپو ݯھترارہ کھوڑی رے چپڵے ساوزئیاکو ساوزیرو قائی چپڵے باونی وا یومونو کون۔ ہمت کھاڵ قائی باونی۔ کھوڵیو چپڵئے انچ بوسک ربڑ تلیان سُم وا زوغیریو بہکی بوسک پھوستار تیار باونی۔ سالہ ای دفعہ مہ تت ݯھَرارار متے انگیاور۔ ہتے چپڵے جو سالوتے دی باونی۔ نہ کیہ وت زروٹھاونی نہ میخ دیکو ضرورت باور۔ ہتے زمانا کھوڵیو چپڵئے نیوف جوش روپیا باونی۔ مہ اسکولو بو ڈق گریݰپو نموتی تن گیاونی۔ زپ دی لوقہ مڵاغ باونی۔ مرحوم استاذ شاہ مسلم ہموݰ شعر نیزی استئے، " جان من جان