زندگیوں سفار۔۔۔25

زندگیو سفار۔۔ ۲۵ ݯھترارہ جو سال سبق ریکو موژی ݯھترار کیچہ اوشوئے؟ چیو سیرہ پھار نیسی کڑوپ رشتو ای کما دکان توری ویلٹی۔ ہتیغار پھار موڑی ویلٹی چنار تیلیو چے غوڈومو کان بی خدا رخمتو دکانتو توری اوشونی۔ ہیس درزیو دکان اوشوئے۔ مہ خیالہ کوٹ سواک اوشوئے۔ ہسے خدا رحمت تان اوشویا نو تو ژاو متے صحی یاد نو بوین۔ خدا رحمت مشور باشونو نیزاک وا میتارو قہرینیو موڑی گیتی بلچہ و چے مستوچہ بندی بتی اسور۔ کھاڑ ژغانتے کیہ رے اسور۔ 

 دودور گازوغئے اللہ تان قدرتہ مو کورار تہ اسپتے نصیب * جنت ݯھترارو وخشی جوانانن مستوچہ کیہ اسیک

 بلچ دودوران ماڑ یہ دودوران ماڑہ قوش کوری اسم ݯھترار حورانن ژاغہ متے نو بوین رے ہوݰ کوری اسُم۔

دیوان بیگیو دورو مڑو رہہ توری اسمعلیہ ہاسٹل شاور۔ ہتے سو جستہ مسافر خانہ وا اولاغنتے آخرانو دی اوشوئے۔ ہیہ ہاسٹلو چے مسافر خانہ دودیریو اسمعلیہ اسکولیان و چے مسافرانن بچے خدایو بو لوٹ نعمت اوشونی۔ ۱۹۸۲ مذہبی انتہا پسندیو ہوستہ پولی پھیرو بتی بغئے۔ ای کندوری بے گنہہ روئے ہیرا بریونو دی ہونی۔ بو امبوہ قران پولونو ہونی۔ ہسے اسپہ پر امن ݯھترارہ اویلو شُم واقعہ اوشوئے۔

 اسمعلیہ ہاسٹلار گانی بازارو اویلو دکانو موژی توری موڑی ݯھیتور اوشونی۔ رہو نس نستو تیلی شاونی۔ بازارو توری ویلٹی اویلو دکان ہوٹل اوشوئے۔ ہتیرا بوغاو حلوا کورے ژیبک ہاسٹلو ڈقان عادت اوشوئے۔ نوغورو پونار گانی قدیمی دروازا ( میتاری مغژیتو دروکاڑہ) پت توری موڑی کیہ آبادی نو شاونی۔ ہیت ݯھیتور اوشونی۔ بازار دی ترنگہ ݰوڑی اوشوئی۔

ہائی اسکولو پروشٹو ایغو سورتو تروئے لشٹی اشٹوکو ژاغہ اوشونی۔ اسکولو دروازا آف نسی تن والی بالو وچے باسکٹ بالو گرونڈ، ہنیسے ہتے ژاغا تعلیمو دفترا وچے کامرس کالچو گرزین شینی۔ ہتیغار موڑی ہاکیو گرونڈ، نچو پونگی فٹ بالو گرونڈ اوݯھ گاز، سوم پرشو چنارو چے تیلو ݱنگ ݱنگ کان شونی۔ جامع مغژیت و چے نوغورو لوٹ دروازہ اسکولار اف لوڑیکو ویریغ اوشونی۔زرگراندہار گنی نوغورو پونہ پت ݯھتور اوشونی۔

ہتے زمانا ݯھترارہ ٹٹی خانو رواج نو اوشوئے۔ ہیغین دیتی دکاندارن، سودہ گیرو، عارضی گیرو روئے۔ ملازمین، اسکولی سف ہتے گومن و چے جواریان موژی بی ابدس چھیناونی۔ اف سینو گوݯو بی تان سورو خالی کوراونی۔ ہیغین دیتی گندگی بو اوشوئے۔ ݯھترارو ہیہ حالت سفو سار مه دش اوشوئی۔ آوا دوناوتم کی زمیندار ہتے گومن و چے جورویان کیچہ کوری لینین رے۔

اسپہ ہاسٹلو ڈق ہار ادینو آنُس تان زپان نگیوکوتے دینین گولوت گیاوتم۔ گولو گوݯو زپان نگی، ݯھوݯھوے، غسل دیتی اچی گیاوتم۔ زپن لوہہ دیکو رواج دی نو اوشوئے۔ صحیح کپ کوری موڑتو درے یا وارزی دیتی اشلکھیاوتم۔ ہاسٹلا تروئے لوٹ ختان اوشونی۔جوہجو جوہچھور ڈق ای کمرائی حال باوتم۔ کمرو صفائی، پیکو اوغ انگیگ، لاٹینن ماژی تیل ٹپے انگیک وا یومونو وختہ داران انگیتی انگار کوریکو  کورمن واری واریا کوراوتم۔

سٹیٹ ہائی اسکول ݯھترارہ اویلو سال غلام عمر مرحوم اسپہ پرنسپل اوشوئے۔ لش پھلش لوگار، باریک تھینی نازک موش۔ جوو سال مرحوم وقار آحمد صائب اسپہ پرنسپل ہوئے۔ وقار صائب درونگ ݱوغ، تھؤن خوئی موش اوشوئے۔ چشمہ ݯاکے سبق ݯھݯھیاور۔ کوٹ پتلون انجک اوشوئے۔ نظم و ضبطو سخت پابند اوشوئے۔ اسپہ ہتو پوشی سخت بوہتواوتم۔ جوشہ اسپہ انگریزی دی ݯھݯھیاوتئے۔ بان دی بو دیاور۔ اسکوردی بینچ ہتو ہوستہ باور تن۔ ہتو ہوستین آوا دی ای بان ژوتی اسُم۔ فقیہ ہموݰ ہوئے کی جوشو جماعتو ڈیٹنشن انتحان نسی نیسی ای جو بس اچہ انگریزیو پرچان انگیتی میزہ لاکھی اسپہ ایگان ایگان کوری تان پروشٹہ مݰکی اسپہ تان ݯاکے اسپہ غلطیان اݰمارے، ہار غلطیو بچے پونج ݯھوئے پھانتو، کریمی دک شروغ اریر۔ بان دی بانس باور۔ ہسے پالیر دی دݰ ݯھامیر دی۔ کلاسہ رقص بسملو منظر ہوئے۔ آوا پھُک بیہہ اوشتم۔ جو غلطی برانی۔ ای ژاغا ٹئیو تھروسکی نو چھینیرو بریتم وا ای ژاغا فُل اسٹاپ نو ݯاکیرو بریتم۔ جوہجو بان اویوتم۔ جنت نصیب بکو لوٹکوہو گلازار برار بےہوش بکو ژینہ دیتی ہسپتالوت اوانی۔

وقار استادو ہتے سزا ہنونہ پت متے یاد۔ ہیغین دیتی آوا تان نویشیرو کاغذوب جو بارہ تروئے بارہ ریم۔ ہیہ سبقو دی اسپتے پرائے کی غلطی پھُک دی ہوئے ہسے غلطی، لوٹ دی کی ہوئے غلطی۔ ہنُن زمانو استاذان لوٹ لوٹ غلطیان سورین نسینین بلکہ غلطین لاڑینین تن نو۔ ہیغین دیتی معاشرہ برباد بتی شیر کوریکوکہ غلطیو غلطی جوݰک ختم بتی شیر۔

ݯھترارو اسکولا اسپہ استادن ہمیت اوشونی:

محترم فضل الدین صائب نیو اسفہ اسپہ انگریزی ݯھݯھیاور، محترم میر فیاض صائب حساب، محترم نور علی شاہ معاشرتی علوم، محترم عمر حیات صائب فارسی، محترم عبدالباری استاد ،اردو، محترم اسکندر حیات سائنس، محترم حسین اللہ جنرل سائنس، محترم آدینہ خان، ڈرائنگ، محترم مولانا عبدالمجید (گہتکو مولانا)، محترم حاکم خان ڈرل، محترم سردار احمد (اے سی ریٹائرڈ) دی پھُک مدہ اسپہ انگریزی ݯھݯھے استئے۔ سف استاذان محنتی اوشونی۔ ہردیار سبق ݯھݯھیاونی۔ الله پاک شوخڅیرو استاذان قبرہ نور کورار، تین اولادن اوݯ کورار، اسیروانتے خیر کورار۔

مه جماعتو یارن پھتی یادی نو گونین۔ ہردی گیاگ جماعتی ہمیت اوشونی۔ بلبل ولی خان چارن اویری، صمدگل، مطائب خان، خدا رحمت، گلازار، زر خان اوچے محمدگل لوٹکوہی، کریم علی شاہ وچے بلبل بیگ  بریپک، سلطان نادر ریچک، شیربچہ خان چنارک، رحمت غازی چارنیغ، سید قاسم شاہ موردیریکو، شہزادہ بہرام چونجک،  افضل جان مستوچک، میر اکبر اوچوہتیک، فضل قیوم دینینیغ، محبوب شیاقو ٹیک، سید احمد څینگورو، نور محمد گولدوریک، عالمگیر انداہتک، شاہ عالم ریݰنیغ، جوان شاہ ریݰنیغ محمد عباس ریݰنیغ، عبدالغفار ریݰنیغ، شربت خان بروکیچی لاسپور، حبیب الرحمن وچے اسماعیل ژوغورو ( کوس نمو کی روخڅی اسم متے معاف کورانی )