زندگیو ‏سفار ‏23

زندگیو سفار 23

ݯھترارو اولانو سفار

1964و فروری مسو بشیر ݯھوئے تاریخہ اوشٹو انتحان شروغ باو اوشوئے۔ انتحان ݯھترارو اسکولہ باوو اوشوئے۔ ہیہ سالہ پت توری ݯھترارو وچے لوٹکوہو اوشٹو ڈق جھترارہ بی انتحان دیاوتانی۔ مه یاد نو بوین ہتےوت دروسہ انتحانی سنٹر اوشویا نوا۔

امتحانو تاریخار ݯھوئے سوت بس پروشٹی مه دادا مه گانی راہی ہوئے۔ مه تت کیاوت دی ݯھترارو بوغاور سوت بسین پروشٹی تیاری شروغیاوور۔ مه شیرین نن برٹ پاچیک شروغ کوئے۔ چئے ٹکی،ݰوݰپ، ݰیݰار، کُلچہ، خشٹ پاچیر۔ خومبوخو تیل نیزی ای بوتھالا کوئے، ݯھیرو  لچھے جم  ݱق کوری وا خور بوتھالو ٹپیر۔ ای جو سیر نسوارو پھیرو اوچے پیݰیرو تماکو ای ݰنگاݰیو دونی۔ تیاری نسوارو ای لوٹ پاویہ کوری تو زوڵیو دونی۔ جنت نصیب بیکو ننانی بیچی مه تتوتے نسوار پیݰاور۔ ننانی بیچی اسپہ گرمبیشو سید وے سورُو اوشوئے۔ مه دادا توتین " مه بزرگ اسپڅار" راوتئے۔ مه دادو  ہتے زوڵئیو شونج، جوالدیز، څھونڨور، شُتور،  براݱ، کیاغ نو بونی نو۔چئے جوش، پیالہ، قوپ، کیپھینی، چایو ݮھن، تروپ، گوڵک، ضرورتو ہار اشناری مه دادو خورجینو بک لازمی اوشوئے۔ کم سی کم جوشپونجی بسوتین پوندی کوریلک باوتائے کوریکو کہ مه دادا ہوزورا سفار کوراور، اسکوردی اسکوردی پڑاو کوساوور۔ چارغیریار ݯھتراروت راہی بتی اچی گیکوتے جوشپونج بس شوخڅاونی۔ ای جو استور، گوردوغ، باردویو باربروٹیان ای څیق رو قافلہ باور۔

ہیہ مکالا دی ہاݰتان درونگ سفارت پوندی کوریتئے مگم نفری زیاد نو اوشتم۔ 

ساعت لوڵے مه گانی ݯھترارو سفارہ پونگ لاکھیتئے۔ ہیہ مکالا ای استورو سو بتی اسپہ پونج جون ہوتم۔ مه دادا، اوا، نذور خان مک وچے پھولوکن زار شاجی۔ مه اوچے پھولوکن زارو ݯھترارو ہیہ اولانو سفار اوشوئے۔ مه دادو، نذور خان مکو چے سمندو ( مه تتو  1949  ترکان سار گانیرو استور اوشوئے۔ بو درونگ عمر ژوتی اوبریتئے) تھ یارخونو چے ݯھترارو موژی کوسی کولوکو ٹین ݯھوری اوشوئے۔

غورغور مسو ہیمی دیتی بُوکہ کوری پیڅھی اوشوئے۔ سوت اوشٹ بس پروشٹی سالغیریک کوری استنی۔ دیہار گانی زومن پھورا پت اشپیرو څادار بیلینجرو غون۔ یارخونوغ اشپیرو ݰوتارو موژو اسمانو رنگہ غیرناغیر نایورن۔ ݰآ زمین غیچی نو گوین۔ݰوکہ کا روئیتو کی پرانی یا ہتیت ݰوکھو پیڅھی نݰی نسی ژاغہ دونی یا اسپہ ژاغہ دوسی۔ ݰوکھار نسیکو ہیم زنار توری نسیر۔ اولانو انُس روکھوݰی روکھوشی شام شوخڅیکو کارگینو وارزا جماعت خانہ تورتم۔ مه دادا استورو دیہی انزے اسپہ گانی جماعت خانو لنگری بس ہوئے۔ تانتے تروق چئے لچھے برٹن ہتو درے ژوتی کھونوان ٹیکی پورتم۔ شویہ کوس دورار اسپتے جیل کا کیہ الانیا، مه یاد نو بوین۔

مه دادا ہاݰ نمونا موش اوشوئے۔ اسپہ گانی جہان خان لالو یا نور بلان شاہ لالو یا کوس دی دورا نو التی جماعت خانو لنگری اسپہ بسیتئے۔ اچہ متے معلوم ہوئے کہ ھ لالان دور ہتے ݰویہ تن شیرانی۔ ہتے زمانا ہار موشو دورو سو مینوان بچے غیژی ختان یا قوش خانہ نو باوتئے۔ دیہہ اݰمارو ای کما چارہ دست روین مینوو ختان باور۔  زیادہ روین ای شلی ختان بوئے،  ہتو سوم نخی جیر بتی پارینی۔ مینو کی ہائے دورو روئے بیندتو، پھران لشٹی، نمیژینی نخہ پارینی۔ مینو نخی پاریر۔ یومُنو وختہ استورو بچے ایرانو دی ہاݰتان ضروری باور۔ زیاد روئے استور حلیاونی۔ ہیرین دیتی اخرانو لین باوتائے مگم ناگونی روین بچے بسو ژاغہ لین نو باور۔ ھ وجہین مه تت اسپہ گانی کوس دورہ بسو نو بغائے البت۔

چھؤچی روشتیو سُم  ریپھی راہی ہوتم۔ چھؤچو چایو تے چونجہ دوانبیگی (دیوان بیگی عبدلعزیز) بابو دورہ باتم۔ بابوو اݱغال، میکی مرزا عزیزو چے سلطان عزیزو نن مه تتو بیچی (ننو څیق اسپسار) اوشوئے۔ مه تت ہتو نو پوشی اہیی اف نو بوغاور۔  ہتیغار تھورتہ پھار نسی پرکوسپہ بسو باتم۔ چھوچین کروئے دیریو ووݰکئین تن رہی ہوتم۔ سنوغرو ویلٹی یومُنو کوسین نو باوتئے۔ تاوو چے اشپیرو رشتو پون باند باونی۔ افسرو جوو انُس ہیمہ ڵوختے ڵوختے پرواکہ خوش خانو دورۂ بس ہوتم۔ خوش خانو بوک مه میکی زیربلی خانو ژور اوشوئے۔ ہتیغار موڵی سفار جم مه ہردی نو گوین۔ بونیو پروشٹہ ہئے سیریا بونی نسی چاچھلین پھار نیسی کوراغہ بسو باتم مه گمانہ۔ کوراغار مرویہ اخونزادو ہوٹلہ بسو باتم۔ اچونزادہ مه تتو دوست اوشوئے۔ پیݯ ݰاپیکو دورار کوری سلائے۔ اسپتے پختی پاچیتئے۔ ای کما برٹن مه دادا اخونزادو ہوٹلو ݰآ پانی لکھیتئے۔ اخونزادہ روخنیو سورہ براٹان ٹیکہ نݰان کوری پانی ریپھیتئے۔ خور برٹ دی ہتی ریپھے اوشونی۔ مسافر تانتے پھُک لوڅ کوکو بچے اچی گیکو سفارو پوندیان مرویو ہوٹلین لکھاونی۔ پونج بسو نمازدگرا اسپہ ݯھترارہ تورتم۔ ہرونی خسمت ہوتم کی کیہ لو دیکو بݰ نو۔ پیکو کوسیک، بو ژاغین استورار خومی پوئی اف نیسیتم۔ ہتے زمانا خاص کوری یومُنو تاو،چھاچھیلی، کڵاک، نوڵ، دراغالیݰ، مروئے ڵونز، میژی چار، کاربیتیڵی خطرناک نواہڅ باونی۔ کورا ریشٹ گیتی ڈوک بوئے کورا گان چھوڵی کوری پونو باند کوئے۔ میژی چارو گوݯو ݱانگ ݱانگ ریشٹون ہنیسے دی مه غیچی گونین۔ استورو گانی بو عذاب بتی ہتو اف نیسیتم۔ ݯھترارو ہتے قدیمی ترانگ بازارو موژتو استان دریرو پیری دکانن استانار ݱانگ نسی اوشونی۔ دکانن پروشٹین ہیمو پھیرکی کوچہہ ساوزے اوشونی۔ پھری یری لوڵیکو ہیمو بختو اسیروو غون ہتے دکاندارن۔ اسپتے اسماعیلی ہاسٹلہ حال بیکو ژاغہ پرانی۔

فروریو 26 تاریخہ سٹیٹ ہائی اسکول ݯھترارو ہالہ اسپہ انتحان شروغ ہوئے۔ سائڈ رومی اسپہ نشیتانی۔ سورو موڵو دیتی پرچہ نیویشک شروغیتم۔ پھری یری غیری لوڵیکو غوش تن نو بوئے۔ امتحانو نگران کا اوشونی مه ہردیی نو گوین۔نقل رے لہازی ہمونیہ پت ݯھترارہ نو گیتی اوشوئے۔ 

 مه پیڅھی اچی گیکو مه دادو ژن نو لاکیتئے۔ نذور مکوچے پھولکانزار شاجیوتین پھُک کیہ سودہ گانی تیتانتے دیتی اچی ویݰیتئے۔ تان استورو گانی اویونو بغئے۔ ایونو میتار ژاو مقتدا خانو چوتن نن مه تتو بیچو ژور اسپڅار اوشوئے ( آمان ملک میتارو ژور) وا مه تتو بو خوش داراوا برائے۔ ہیغین دیتی مه دادا ݯھترارو گیتی ہتو پوشیکو بوغاک برائے۔ ہیہ مکالا نیوف جوش بسوتین بغئے۔ استورو زیختی، تان اسپڅارو چے تو ژیژاوان سو ہردی پھتی کوری مه انتحان نسی نسیکو انُس ا چی ݯھترارہ توری مه گانی دورتے اچی روزانہ ہوئے۔ اچی گیاوا کورا کورا بس ہوتم ،روخڅی اسُم۔ ݯھترارو آویلو ھ سفار متے بالکل مزہ نو اریر۔ نہ کی ݯھترار مه خوش ہوئے۔