زندگیو ‏سفار ‏۔۔۔ ‏21 ‏

مہ تتی میر صاحب خانو ہتے اشرو ہنُنو غون مه غیچی گونی وا ہار غیچی گیکا متے ہاݰ افسوس بوئے کی آوا ہتو ہتے ای انوسو پریشانیو وا ہتے موخو غوݯھار اشروان بدیلو ہتوتین اچی اویہرتیکو نو بیتم ہتو زندگیا۔ مه څیق تتی شیر نبی خانوت الله جنت نصیب کورار کی ہسے اوا جم بیکا پت پوشور اپاکہ نو تاریتئے "مه ژاوتین پرفیز آوا کیچہ ژیبوم رے". ہاݰ مہرو چ محبتو مک گینی ہنُن زمانا کورا اسونیا؟ تیتن روحانی زندگیو اسائشو بچین آوا ہمیشہ تان خودایوتین زاری کومن۔ الله پاک تیتن قبرا نور کورار۔

مه ہتے لہازیوت نابتو انداو راونی۔ ہتے زمانا اسپہ مستوچ اسکولو اچہ ڈسپنسری شاوتئے۔ قطب الدین ( ایبٹ ابادچی اوشوئے۔ مستوچہ دور کوری، بوک التی حال بتی استئے) پوسٹماسٹرو ژاو، محمد شفا ہیرا ڈسپنسر اوشوئے وا شفا ڈاکٹھار نمو سورا منشور اوشوئے۔ مه لہازیوت ہسے ای جو پاوی بوتھالا تروق اوغ متین پرائے۔ تروق رے نو راوے فقط سنکھیا اوشوئے۔ چھؤچی کی پیتم ویزینہ پت ہتو تروقی بوکتو لوچھاوتئے۔ ای مس ہتے تروق اوغو پیکو مه ہتے انداو بغئے۔

جوش نیوف شور تروئے بشیر ترویو سال مه جو تتی گینی پرکوسپہ آویلو بنگلہ نمو سورا مہمان خانہ ساوزیتانی۔ تورکھوو رائنار تراݯون انگیتی ہتے زمانو انگریزی کمرہ ارینی۔ ہتے تراݯونو نم گفار/ غفار استاد اوشوئے۔ ݰیلی اشپیرو ٹُنگ ریگیݰ، صورتی،  خوشان موخی، کروڅو کروڅو قافیہ گو، زندہ دل انسان اوشوئے۔ ہتو کاردو ہتے ختانان تواریچ، وا دواہتن وخت چڵخدورین  چوکٹ دواہت ہنیسے دی تھیسُم کاردو غون ݰیت شینی۔ ہسے ختانو اسپرازگو ݯھیترہ بینی، امݯھے، کڵیڅھن ݯاکے، تواریچ درے تیار کوری، اچی زراٹھے کھانجن ٹیکتو نے ای انُس اچی جوڵ دیتی دوپھیتئے۔  آوا ہتو لوڵی کافی کاریگار ہوتم۔ گفار استاد چھویو مس توریکو اسپہ سوبتی کریزمہ بری ناوتئے۔ الله توغو قبرا نور کورار۔

ای کھیشوری استور دی گفار رد استادو سو باوور۔ آوا ہتو اوغوتے التی پریماڑیو گوݯو اوغ دیتی ݰوتارتو داوتم۔ اچی ہتیرا دے دورا انگیاوتم۔ 

سوتو جماعتو انتحانہ پورا اسکولی اویل لمبار ہاتم۔ اوشٹہ گیکار اچی عشقو لہازی مه سُم جوست ہوئے۔ دیہہ ای کومورو سو مه ہردی ہاݰ ݮوکتئے کی ہار وخت مه خیال ہتو سوری بہچیکا پرائے۔ خصوخص اورارہ دی ہتو سو حال حاویز بہچیکہ پھریتم۔ چھوچہ اسکولوتے بوغاوا اچی گیاوا مه غیچ ہتو دورو سورا بہچور۔ کیہ وت کیہ وت غیچ سورا توری ہردی بے دھنگ برافیر وا کیہ وت تو دیدار نو بتی ہردی غمگین بوئے۔ شامہ روڅیو بہنا گولوغو ٹیکا بی ملگیریان سُم نشی پتی کوراوا موڵہ موڵہ تو لوڵی غیچھان تھروݰنی گریو پھُک کم کوم۔ ہتے روئے دی مه خوش داراور۔ کوریکو کی کیہ نو کیہ بہنہ مه رویتو دیاور، دورہ دی گیاوور۔ غیژی مه رویتو دیکو پھوک کوری تو موختو لوڵی شرم گیتی پھک بتی نسین نسیم۔ ہسے دی مه موختو لوڵی ݯھُم اوسی سورو موڵو دیتی نسین نیسیر۔ اچی پیݰمان بوم کی تان ژانو لوؤ تو سو کو نو پھریتم رے۔ ہار وخت قسمہ قسمہ دونیم  کی کیچہ کوری تان ژانی شیرو رازو توغوتے سورا نیزیم رے مگم رویہ دیکو مه لگینی ڈوری بوئے۔ شرم گیتی مه موخ ݯھوری بیر۔ ہتے زائلہ مه بلکہ اسپہ ہتے نافہم عشق چومچوقوٹ تن بہچی ہتے یوران بغائے وا آوا اوݰٹو امتحانو دیتی پرکوسپار بغاتم۔ مه تتی شیر نبی خان مه ہتے ہردی ݯوکیکو ہوݰ کوری مه سورا قافیہ کوراوور ہتے کومورو لؤو دیاو۔ باقی کوستے پتہ کیہ نو اوشویا، خودائے خبار! ہسے کندوری سال اچہ پت مه ہردیا بہچتئے۔ 

مه ہتے نافہمیو عاشقیو ہرونی فائدہ ہوئے کی اوشٹو انتحانہ ہاول سیکنڈ ڈویژنہ پاس ہوتم مگم تان جماعتیان موژی اول لمبار تان ہاتم۔