زندگیو سفار 20

میستُچو مڈل اسکولہ سبق ریکو موژی جو مکالا سخت لہاز ہوتم۔ ای چھویو مه پزو ہاݰ  ورینز ݯوکیتئے کہ تھویک توریرو غون سریتئے۔ موژغیشٹی تتیو نسو پوراوتم۔ آوا ژریغ کوری روپھیکو مه تاتی دی روپھائے۔ورینز مه دمو چک کوکا پرائے۔ تاتی مه گانی دوروتے اوائے۔ چونݮیک نن دی روپھیتئے۔ رُوشُونو پیݯ کوراو مه  پزہ لاکھیکو پھُک ہھلش سریر۔ رُوشُن اوݰک بکو اچی ݯھامیر۔ ھ زائلہ روشتی خومیتئے۔ آوا دورو نخی نسی پورتم۔ چونݮیک نن چھؤچو ہاسیوتے تاو پیڅھتئے۔ ہارونیا سونوغرو طبیب خلفہ گلاس شومہ سلام کوری یی اوتیتئے۔ گیتی نشی بشارحوالار پروشٹی مه ویلٹی لوڑی چونجیک  ننو سار بشار اریر " مه ھ پھُک ژاوو کیاغ ݯھامیرانا مه ژور؟" نن توتے لو پرائے کہ ہیہ چھویو ورینز چوکی اسور۔طبیب مه تے ریکی " اے مه ژاو کھاپسن دیا؟" آوا دی ریکو  متے ریکی "کھوپی اف تھوے" آوا کھوپی اف تھویکو لیئے آموشتہ تھورو یی نسائے۔ ہارونیا خلفہ ریکی " او ژاو تو زتُکجم بیرو براو"۔ چونݮیک ننوتے کاویر انگیے ریتئے۔ یکدم کاویرن اوغو لاچھے مه پئیتئے۔ تھمام گرم ژیبارمن و چے پیارمن وا پوشور متے پرفیز اریر۔ ای مسہ پت آوا وے ہوݯو وے تروپو کاویروغ پیتم۔ ہرونیا ہتے لہازی مه سورار نسائے۔ اچہ معلوم ہوئے کی زتُکجم نمونیوتے راک برائے۔ آوا نمونیا برو بریتم وا کاویروغ پی جم ہوتم۔ مگم کاویروغو سار ہرونی دیݯھیکا پھریتم کی کندوری سالہ پت وا أپکا نو تریتم۔
ہیغار پروشٹی  سال گریݰپو چھوٹی شخڅے اچی پرکوسپہ  گیتی کم مودو موژی انداو ݯوکیتم۔ ہار انوسو جوش ای بجو چے جوو موژی ہتے انداو مه سورا دوئی۔ اولانی قالب پیݯ اتیپیر۔ تھرینݮکارو گوئے۔ ہتیغار اچی اوݰک شُوشُو کوئے۔یورا پوریکو دی قالب پیݯ نو بوئے۔ ژینہ پوری اسیکا ہاݰ سریر کہ ژین مه گانی اسنی بیرن رے۔ نسہ اسیروتے قوژد کوم " مه سوری پورے اف غیرومن" کیہ وت ہوشہ کیہ وت بے ہوش حال بوم کی چھوئے برابرار اچی انداو لا کوئے وا پھک اوریم۔ چھؤچی روپھی ہسی بوم وا اسکولوتے بیم۔ اسکولار اچی گیاوا  کیہ وت کیہ وت پونہ اسیکا انداو شروع بوئ ۔کیہ بتی بتی دورا توری پاریم۔ کیہ وت دورا توری ݰاپک پروشٹہ گانیکو  وا کیہ وت گرانیشو ݰاپکو ژیبکار اچی مه سورا دوئے۔ انداو سورا دیکار اچی مه چوٹھو سوری کوئے۔ اوغار غیر کیہ اپاکہ تارئیارو نو گوئے۔ ای انُس اسکولو تفریحو موژی انداو مه قالپہ ھائے۔ استادو سار چھُٹی گانی تیزے تیزے چنارو گنزولتو غیریکو مه سُستیتئے۔ طوطی میشٹیرو دورو نسہ رہا تھرونیو گوچی سورو کوری پورتم۔ ای مودہ اچہ کا متے ہوئی پرائے " اے ݯھیر برار کیانی ہو؟" غیچھان اہیی کوررم کہ دودوشایو شپیر مرحوم  مه نسہ نشی اسور۔ آوا ریم کہ مه انداو آریر۔ ہسے مه بستو  گانتئے وا مه ہوستہ ݯوکی دودوشائیو نیݰیو گورزینہ اوائے۔ بیرموغ کانن موڑا نخ شاوتئے۔ جنت نصیب بکو چونجک بیچئیوچے اقبال نگین برار ہتیرا نشیرو برانی۔ مه یورو لوڑی اقبال نگین برار دوری بی کیہ گولئے انگیتی متے پرائے۔ نسہ ژین اوشوئے ہتیرا مه پوریتانی۔  انگہہ ہوتم کی گور نمازدگار بتی شیر۔  بہشٹ نصیب بکو نوغ ختانیچی بیچی (څیرو ݯارویلو شاہ نگینو  اݱغال، مه لوٹھورو بریژایو، دودوشایک کایو نن) دی گیتی مه نسہ نشیرو برائے۔ کھل مه سو تھاشُش بیرو برانی۔ لوڵتم انداو مه لاکی شیر۔ آوا ڈاز باز روپھی راہی ہوتم۔  بیچیو چوت ،اقبال نگین برار بس بوس رے دوسی بوھرتن نیتانی۔ آوا ریم کی " ہمونی مه تاتی مه مݰکی کورا بغائے۔ مه دودوشایہ گیکار ہسے خبار نو بوئے۔مہ ملگیری دورا توریرو بونی۔ آوا تفریحہ چھُٹی گانی گیتی استم۔ مه ملگیری دی مه ہیا گیکار خبار نو اوشونی۔آوا ملال بکو ہتیت بو پریشان بیرو بونی" رے آوا کوستے قبول نوکوری راہی ارتم۔ لیشو پھرتینیو ہونو موژا گیکو اہیار مه موژغیشٹی تاتی یو نسائے کی  اُونو پھورا اشرو غوݯھار بتی شیر۔ (جاری شیر)