زندگیوں سفار 19

دیزگو سیرا پھار نسیکو نو بتی یوکمو ووݰکی قدیمو پونین اہیی راہی ارتم۔ بیی بیی یوکم سیرا بیکو ٹُمٹنگ شام ہوئے۔ یوکمار پھُک موڵی شروغ بتی یوکمو سوری نسی کم دی کم ای ہزار گز ݱانگ زوموتین یوکم سیر رینی۔ قدیمہ نچھاغو ویلٹی پون شیکہ ھ زومو ٹکیکی  ته برائے۔ بریپہ گرورتو بوغاو دی ہیݰین تان کوساوا برانی۔ ہتے موژین ہسے پوکیڵ دی شیرائے مگم مه چقہ شمپھت ہتیغین پھار نیسیکو تان سورو کوریرو غون۔ ہتیغین دتی مه تتی مه گانی ہتے ٹیکھین بغئے۔ ہتے زومو ٹیکا بیکو ݰا کھوٹ اسمانی اییا توری بوݰیک یو غیریتئے۔ ہتے زمانا ہوستو بجلی نو گیتی اوشونی۔ بیروا مه تتیو سو خامخہ بیسیر۔ ہسے افسرو بچے ضروری اشناری تان سو لاکھاوور۔کیچہ ہوتم کیچہ نو یوکمو سورو دراغلی زوپھی، قف دوغورن ݯاکے اف خومیتم۔ اسپہ گمانہ بانگو تھصیلدار عبدالجہان خان یوکمو کیچ آسور رے، امیدا استم ہتیرا بس بوسی رے ۔ ہتو دورو کیہ روشتی غیچی نو ہائے۔ توری رو ای کوماڵین پھُک روشتی پوشی ہتیرا باتم۔ ہسے تو ݯھیر برارو پھُک کوٹو برائے۔ اسپہ پوشی پریشان ہوئے۔ نہ دوری باوری نہ پوریکو ژاغہ۔ ہتے دورو خڅُم پین جوان میک ( خودائے جنت دیار) مه تتیوت ریکا پرائے ، " اے لال! آوا یوکم گولا پیسہ پھار نیم۔ پھݰکو محررو دورا بسو بوغور، ہیا کیانی بومی؟۔ دوری ہیچ کیاغ نیکی۔ نہ ݰاپک، نہ پوریکو ژاغہ شیر، سوری دیکو زُپ نیکی۔ بیری باݰیرن"۔ ہتے زمانا درغا نݯ عام اوشوئے۔ دیہہ ای کما اݰمارو دورین ݰاپیکو گزاران باوتئے۔ مه تتی ریکی،"اے برار! گولوغو ہون گوین، ای ویلٹی گیرچھوئے، آوا تان پھُک ژاو گانی ھ گولوغی نو دوم۔ ته استانہ ڈوق دوسی۔ شُوکھور مه سُم شیر سورا داری حال بوسی۔ برٹ اسپہ سو شیر۔ چئے مڵاغ دی مه سو شیر"۔ اسکوردی لو ہیہ کی اسپہ پین جوان میکو آستانہ ڈُق ہھریتم۔ ای پلیسک اسپہ موڵہ پیستئے۔ بیکھن وارزین دیتی تتیو شوکھورو کھاکہ داری روشتی ہائے۔ گولوغو ہواز دی پھُک کم ہوئے۔ پین جوان میک مه ڈوک اریر۔ تتیوچے ہسے ایغو ہوستہ دوسی پھُک باݰوغ لوڵی یی نسانی۔ پین جوان میکو تے دولت زیاد کوری مه تتی مه گانی چھؤچو چایوتے ݰیݯہ سید جانی خلفو دورا تورتئے۔ خلفو اݱغال مه تتو چوتانتے نویس گیاور۔ جنت نصیب بیکو  بو مہرگین کئے اوشوئے۔ خلیفہ دی مینو کوراک موش اوشوئے وا مه تت گنیا نتے بو عزت کوراور۔ اسپہ سو کو نو بچیتانی۔ کئے داری پولی ݰاپک اریر۔ ایوکُن بچیتئے۔ ہتیتان ژوتی ݯت گرنیش بیکو اُہرکنہ تورتم۔ بابا گورزینہ استائے۔ مه واوی لوٹڈوکو غاریتو بوغدو برائے۔ مه پھُک بیچی دورہ استائے۔ اسپتے ترینو سو ٹیکی الائے۔ بابوو بچے کوری پیڅھیرو برائے مه واوی۔

اُہرکنہ اسپتے پتہ ہوئے کی دیوسیرو سیر دی اوغو بوغدو برائے۔ تیلہ سیری ژور چھیتی اوشوئے۔ ہنیسے اسپہ گزی و نچھاغو سیرا نیسی چارغیریوت گئیلک ہوئے۔ مه تتی دیزگو سیرو وارزا ' درونگ پون درونگ ژن راستئے' ہسے قست ہوئے۔ اُہرکنار گزین کم سی کم جوش ݯھوئے میل دودیری۔ اسپہ خور بشیر جوہجو میل کوسیلک ہوئے۔ مه بابا بس بور رے زور لکھیتئے۔ شاموتین تہ واوی دی اچی گوئے ریتئے۔ مگم واوی نو اسیکہ بس بارو کھیوتے گوئے۔ ای ویلٹی مه ہردیہ پھت بتی اوشوئے نن تتن او چے څڅیق برارگنین بچے۔ شمینی چھینی راہی ہوتم۔ مه تتی مه گانی اہمیتو شوتارو گیتی چارغیریو دورو پروشٹہ سینو دونار پھار کوری اسپہ استور پروشٹ انزاوور رے قویتئے۔ اسپہ کیٹھے کیٹھے ٹنگ شام بیکو شوڵکوݯھو کڵیڅ کوݱومہ تورتم کی استور دی انگیتی اسونی۔ ہتیرار موڵی استورو ٹیکو نشی بادشاہی متین توریرو غون سریتئے۔ پوریکو وخت بیکو دورا تورتم۔ ہیہ مه زندگیو آویلو درونگ پونغوسی اوشوئے۔

(1962) سوتو جماعتہ گیکو گل مراد خان حسرت صائبو او چے قاضی محبوب الٰہی صائب اسپہ اسکولہ ہانی۔ گل مراد صائب نوغ استاد بتی ہائے وا سفان سار پھُک استاد اوشوئے۔ محبوب الہی صائب خور کیہ اسکولار بدل بتی ہائی مہ گمانہ۔ سوتہ اسپہ  حساب وا جنرل سائنس ݯھݯھیکا پرائے۔ لائق استاد جوݰونو باوتئے۔ سوتو جماعتہ اسپہ ݯاکے اکسیجن، کاربن ڈائی اکسائیڈ گیس تیاریہ ݯھݯھے استئے۔ گل مراد صائب فارسیو استاد ہوئے۔ ہسے دی لائق استاد مشور ہوئے۔ حضرت اللہ جان صائبو ژاغا نورالامین صائب ہیڈماسٹر بتی ہائے وا اسپہ انگریزی ݯھݯھیکا پرائے۔ ہتو ای کما لو مه ہردی گیتی ہنیسے دی مه اوسارو گوئے۔ ای انُس انگریزیو پریزنٹ، پاسٹ، پاسٹ پرٹسپل خبار گناوا کھوݱو حسین نادر (سوتو جماعتہ مستوچو اسکولہ داخل ہوئے) غلط جواب دکو استاد بانو تو پزو ݯونگ دیاو  ہموݰ ریکو" کھوݱ، کھاݱ کھاݱین، کھوݱ، کھاݱ کھاݱین "  اسپہ سف بروق دیتی اوسیتم۔ کیہ وت دی اسمبلیا تقریر کوراوتائی راور" پدر من سلطان بودو پھاو ہیرا بوہتو ٹیکا لاکھی گیور جیما"  رے څریک څریک تھواور۔ ھ اشارہ لالان اژیلین ویلٹی باوتئے۔  گل مراد صاحب دی سبق نو یادییاک وا نو ݯھݯھیرن بو چوو دیاوتئے۔ نادر اعلے روزانہ بان ژیباور۔ سفن سار زیات قاضی احمدالدین استادو پوشی بوہتواوتم۔ اردو ݯھݯھئیاور اسپہ۔ گرائمرو اسپہ تے نویشے نویشے تروئے چھور ورق ٹپھے چھوچین کینہ کینہ خبار گانی نو یادیرو ڈقان ڈنگ کوڑانوچے کورکُنن شاخئیاوُر۔ آوا یادییاک اوشتم مگم ای انُس آوا دی بان اویوتم۔ شک ملگیری ہروݰ بان ژیباونیکی دانیوت پھوناک ݯوک ݯوکتو اوشٹوریرو غون باونی۔ ہتے "رقص بسملو"منظر مہ ہردی کی ہائے ہنیسے دی مہ اوسارو گوئے۔ ہیہ زائیلہ مستوچو اسکولو انُس پھار شوخڅاو ہانی۔ ہتے وختو کندُری واقعان روخڅیتم۔ ای کما واقعہ ہانُن انُسہ پت مه سار روخڅونو نو بتی شینی۔