زندگیو سفار ......16

   گلاب تتے تک انزیمن ملکھون سلامی"

گمبوری تک انزیک بو اچہ زمانا رواج ہوے مه خیالہ۔  ملکھون سلامی کیہ کوراونیا۔ قدیمو تک انزیک پھیسو پھسو برائے۔ عاشق معشوقوت پولیرو کاغزو نس، شُتور لینڈُک، شیشو نس پھور لین کوری وا خور ہاݰ اشارو اشناری مڑاغ کوری انزیاوا برانی۔ ہیت عاشقو خاص خاص حالاتن معشوقو تے بیان کوراک برانی۔ آوا ھ قسمو تک انزیکار ہتے وخت خبار ہوتم کہ ای انُس ہاݰ مڵاغوشی مہ سُم دی تورتئے۔ مه عمرہاݰ باریکی کورمن او چے خفیہ لوان ہوݰ کوریکا نو توری اوشوے۔ ای انُس غیژی اسکولوتے بوغاوا دیہو ای پژال مه روئیتو  دیتی ای پھُک مڵاغ متے تارے ریتئے" ہمو فلانکی کومورو تتے انزے اسور"۔ آوا حیرانومان بتی پژالو موختو لوڑیتم ۔ وا ہتے مڵاغو ہوستہ کوری لوڵی ٹُمٹاٹق بتی بہچیتم۔کیہ لو مه اپکی نو ہائے۔ اپکی ہیزو ݯھوݯھو ہوئ۔ چھؤچی جواب دیت رے پژال تان کیڵی پاین ڈیکے بغائے۔ مه ہردی برف دیکا پرائے کہ ہیہ کیہ نوغ کورُم پوشتم۔ خیالی نو شیرو۔ ژانی نو گیرو کورُم۔ مڵاغو بستو دیتی کھوشتے اسکولوت بغاتم۔  خیال ھ سوری بہچی ہیہ مہ ژنی ہائے کہ آوا البت جوان بیرو بریتم کہ کومورو متے تک انزیتئے۔ نو آوا ݰئیلی البت ہتو ہردی مہ سو  ݯوکیتئے۔ ہاݰ تک انزیکو بارا اسپہ سار لیلوٹ ڈقن سار مه کارہ اوشوئے۔  ہتے انُس مہ خیال ھتے مڵاغُوشیو سوری بہچی اسکولار اچی ہاتم۔  تان دورو پونہ ݯوکتو ݯوکی پیݯ گوڵو غیری ہی ھایی لوڵی تسلی کوری مڵاغو بستار یی نیتم۔ بݯھیریتم کہ پولیرو ماچسو نس، کاغذو نسو موژا پالے، لین دیرو شوتور وا پھورو درو سو وا دی کیاغ بلاہ بوغمہ ہتے مڵاغہ شینی۔  آوا ہیتن مطلبو ہیش کیہ ہُݰ نو ارتم۔ تیتن اف پیڅھارو دی نوہائے وا نہ تان سو لاکھیو ہمت ہوئے۔ اچی مڵاغ کوری ای بوہرتو بخی دیتی دوروتے بغاتم۔  مه دماغہ ہتے نوغ واقعہ ژاغہ گانتئے۔ ای ووݰکی ہاݰ معاملار  بےخباری ،  کم عمری وا موختاشمی ہمیت سف مه رہا پولوغ دیاو اوشونی کوریکو کہ آوا څیقیاری بو شرمدار اوشتم۔وا ای وولٹی تان سورو بے غیرت پشئیک دی مه عزتو سوال اشوئے۔ کیچہ کہ جو سال پروشٹی ریزگیلیو میکیو وم مہ اورارو پالے مه ہردیو سکونو التی اوشوئے ہانُن ھتے دیہو خوبانو تک ہتےقسمہ تن متے غم بتی مه ہردیو سراسیمہ کوری لاکیتئے۔ بو دونیکار اچی فیصلہ اریتم کی ہموݰ کورمان اچہ ݯوکک مه عمرو  ڈقان کورم نو۔ مه تان سورو ہتے مژاردویُو پژالو چے ہتے بوسکموخی کومورو سار دودیری ھالیلک۔
 اوہرتی چھوچی اسکولوتے باغاوا پترانگازو اسکولیان ویسی ہتیتن سو جُست بتی بغاتم۔ پژال دوچھارا گیتی متے پھوکیتئے۔ اوا کارہ نونشیرو بتی نسین نسیتم۔ غیردی انُس دی ملگیریان موژا اوتی باتم۔ لوڵتم کہ پزال کومورو اچہ ݯاکے گوین۔ ہتےکُمورو ووݰکی پھوک کوری لوڵیکو نو بیتم۔ ای کندوری وخت ہتے پژال ہار رویہ دیکا متے پھوکیاو بغائے۔ ہتےسو مہ سار ہوست پارویلی وا مه اچہ نو ݯوکیتئے۔ خودائے ای لوٹ بلاہار مه خلص اریر۔

پونجو جماعتہ مه لوٹ بیکو جوو ثبوت مه کورمہ اضافہ بیک اوشوئے۔ مه دادا متے ای خور کورم ذمہ اریر۔ اسکولار چھٹی بتی اچی گیاوا ژوئیتو نسی اوغو لوڵی ݯھوغیو غوسپانن چھینی وا کورا بخ نیرو ژاغان چھوتی درے اوغو گانی گیک۔ژوئے نوغ وا اوغ کم اوشوئے۔ بخ نیزی غورو دی بوغاوور وا ژویو موڵہ خور حصہ دار اوغو چھوغی دی کوراونی۔ ہیہ زمہ واری متے بو گران اوشوئے۔ اسکولار نسی سورو گازہ گیتی ٹیکھو کوٹووت اہی ݮوکک تریچمیرتو اوسیرو غون         سرئیاوتئے۔ کم سی کم ای میل ݮوکتو بی ژویہ نسی ژویو ٹکھین اوغو لوڵاو گیاوتم۔ ژوئے ہونکوٹی ٹھینگو موژین بیکین گرانیش بکو آئی   جنگوغ ژویو خوماوتانی۔ ہتیتن پوشی مه لیئے ݯھوݯھو باور۔ قراقوڅی ݰُم ݰݰا دودور سورن ٹوکھے مه بوہرتوئیاوتانی۔ ای میل ݯوکتو کوسیکا دی خیر اوشوئے ہتے گوغچاوتن پروشٹہ۔ ہیغین کیہ وت کیہ وت اہی نو نیسی موڑین تن گیاوتم مه تتوت پتہ تن نو باوُر۔ توری بانگو دی کھنگارن ٹیکھار توری ابادی نمے زیارت پناہ شاہو دور وا تو برار ساعت پناہ شاجیو پھوک کوٹو رہا موڵی وا حیدرو تتوتھیسو کاردو پھوپھُک دور درونیلی نامین وا کڵیڅکوڵومو دولت بپو اباد دور رہا توری غیچی گیاونی۔ باقی سف بیابان اوشوئے۔ رہو نس نستو بوہرتن ٹیکھین دودور سور ٹوکھیک ہنیسے دی مه غیچی گوئے۔ آوا دودورن پوشی دش بوہرتواوتم۔ کیہ وت کیہ وت اسپہ زارو دورو پروشٹہ شوغورہ گیتی نوغور دک دی کوراوتم وا کیہ وت بمپوغاڵ دی کوسی۔