زندگیو سفار۔۔۔۔۔۔ 15

نوٹ: اسیرو زندگیو ژغا" زندگیو سفار" راور)
بانگو پرائمری اسکولہ چھورو جماعتہ باتم۔ اردوو عبارتی غیچ ݯوکاو ہائے۔ ہیسُم جُستہ مہ ہردی دی سبقو چےاسکولو سُم ڈنگ باو ہائے۔ تت دی دورو پھتی کورمن متے ذمہ کوریکہ پرائے۔ بوسُنو وختہ اسپہ دورو پرشو ݯھوݯھو گول چوکیستار ہیم بُوری یو گیتی اسپہ زمینو  ژغہ ژغا اوڅ نیسینی۔ ہیتن تھروسکی ژوئے کوری ہون ہونی ݯاکے مه دادا موݰیچ ݯاکے استئے۔ ہار چھوچی اسکولوتے بوغاوا ہتے اوغن پھارو یی رو غوسپانہ دک وا اچی گیتی ڑایان لوڑک مه ذمہ واری اوشوئے۔ یاردویُپو مݰکک دی مه گردنی اوشوئے۔ہیسو جُستہ  ہمی کورمان آوا اسکولوتے بوغاوا وا اچی گیاوا کوراوتم۔ وم نیزیک مه دش کورُم دی متے حوالہ اوشوئے۔ ہمی تروئے کوروم کھل مه دش اوشونی مگم تتو حکمو نو مانیکو کیہ لو تن نو اوشوئے۔ ہیغین دیتی ہردیو ٹیکہ بوہرت لاکھی ھ ذمہ واریان پورا کوریکو کھوشش کوریکا پھریتم۔ مونوتے یاردویُو مشکی بیم، ہتے موش جام گوم کی ریتئے جم کہ نو ہوئے اݰقالی کوکو نو باوتم۔ وا ہاݰتان مون ادا کوکو بچے ومدارو دورا دی بیم۔ کیاغ کہ پرائے جم، نو ہرائےکیہ زور نو لکھوم۔ حمالی اوڅھو موݰیچن ہردیار اوغ ݯاکیم کوریکو کہ ڑائے بتی پولیکو مه تت سوال جواب کوراور۔ تان شوقو سورا بوسونو وختہ پھوردو بویک وا گرݰپو ݯھنو وشلی کورک مه خوش اوشو نی۔ پھوردو بویک تان تاتی شیرنبی خانو سار ݯھݯھی استم  وا وشلی کورک پوختون بپو چے شپیرو سار۔ ہیت کھاڑ ݯھنو وشلیہ مہیر اوشونی۔ وشلی  کوریکہ ہتیت مه استادن اوشونی۔ خودائے جنت تیتانتے بہشٹ نصیب کورار۔
ہتے سال مه دادا مہرتنگ، خروزگ، دیزگوو چے استچو عشرو ٹیکو گانتئے۔ ٹیکہ بوژیکو بوغاوا متے منشی بتی اسپہ سُم گیے ریکو تیار ہوتم مگم ژانہ بوہرتیتم کہ سہی نویشیکو بوما نوا؟ اچی بانگو مه استاد شاہ مسلمو گانی بغائے مه ژن خلص ہوئے۔
بوغدو شوروو  ای بُہتوناسو واقعہ مہ ہردی ہائے۔ اسپہ دورو پروشٹہ ایمیت دیہہ چھور پونج سالہ ڈقو کیہ ژندار اوائے رے خبار ہائے۔ وا ای خور ژغا
 خبار ہائے کہ ای څیقو شپیر اوائے رے۔ ھ قسمہ بو څیڅیق ژاندار غری یونی رے کارہ تورتئے۔ اسپہ سخت بوہرتیکہ پھریتم۔ شامار اچی بیری نیسیک باند ہوئے۔ ہتے زمانا  لیٹرینو رواج نو اوشوئے۔ بةریبݯھیت ݯھیتری ابدس چھینین باوتئے۔ شامار اچی دورو ای تکڑہ کولانو څیڅیقان بیری التی انگیاور۔ داداد دی تھویکو نسہ لکھی پوریکا پرائے۔ ہتےشورو وا یومُنو یارخونو سف روین ہتے ژاندارو بوہرتونیا لئے ݯھوݯھو بتی بوسُن ہوئے

چھورو جماعتہ اسپہ چھور ژون بہچیتم۔ صحیح یاد نو بونین۔ کیہ آوا، فرمان پناہ مرحوم، جنان وچے شیرنواز خان چھورا ہاتما۔ بیرزوزو پیرو لوٹھورو ژاو سید حسین شاہ چونجو اسکولار گیتی داخلہ گانتئے۔ کھل پونج ہوتم۔ گیاک سالو بوسُن انتحانہ صرف آوا چے سید حسین پاس ہوتم ،شک ملگیریان اچی بہچیتانی۔ سید حسین اویل وا آوا جوو لمبرا پاس ہوتم۔