اسیرو زندگی 14

 اسپہ ترویو جماعتو انتحانو گانکوتین کوراغو خلفو ژاو مستوچو مڈل اسکولوہیڈمیشٹیر حضرت اللہ جان  صاحب  ہائے ریتانی۔ اسپہ کارہ تورتئے کہ ہسے جوش جماعت پاس برائے۔ اسپہ سور بڑانز اریر۔ نست سال سید دینار علی شاہ استاد اوشٹ پاس کوری گیتی اسپہ استاد بتی استئے۔ ہتو اوشٹ جماعت پاس بک تن اسپتے اسمان سرے اوشوئے۔ انتحانو ھ غمو سو جوستہ انتحانو نست شامہ بونیو قلمدار اسپہ دورہ مینو ہاٴَئے۔ مہ تت بونیو ڈمبوز گانیرو قلمداروتے بو اخلص کوراوتئے۔ ہسے ہار سال یومُنین یارخونتو گیاور۔ ہار دیہہ ای کما خاص دورین بس باوتئے۔ قلمدار بسی دی  خلفہ بسیو سار کیہ کم نو باور۔ بوتو ݰاپک بو جم باور وا چھوئے بوتی لازمی اوشوئے۔ زاغہ ٹاربٹ قلمدارو خوش ژیبارمن موژار اوشوئے۔ قلمدار چھوچی راغیشٹی روپھی دوروتے گیاور وا ڈانگو گوݯو نشی غیچھن تپ نیشے کوکیاغ رے وظیفہ کوراور۔ ہوستہ تھُل تھُل پھولوکن سُم دزبے باور۔ کیاغ روار کیاغ نو اوا ہیش کھیو ہُݰ نوکوراوتم۔ اسپہ څیڅیق ہتو پوشی بُہرتواو تم۔  ہتے چھوچی دی قلمدار ژوت روپھی ہائے۔ مہ نن ݰاپک کوریکو بچے بتھولو یو گانی استئے۔ قمدار گیتی نشیکو مہ نن توتے ریکی، " اے تات ہنُن مہ ہیہ ژاوو انتحان شیر۔ ہموسو دم دیت کی" قلمدار  ریکی، " جام لہ مہ پھوردو ای گوڑک متے انگیے"۔ مہ نن گونجی بی ای لوٹ بڑاڅ گوڑک گانی الائے۔ قلمدار ہتو ہوستہ کوری شونو موڑا کوکیاغ راو ہتیرا پھویکا پرائے۔ ہار پھویکا اپکی ہیزان دی گوڑکا پھروݰیکا پرائے۔ ہیزان پھروݰیکو لوڑی تن مہ ہردی کوتیکا پرائے۔ بو مودا قلمدار گوڑاکو متے تارے ریتئے، " اے مہ پھوردو دورار اف نسی اسکولہ توریکا پت پھُک پھُک کوری ہمو ژوتی انتحانو وختوت ہمو کھُلاوے جیما"۔

ای وولٹی انتحانو بُہرتونی کیاغ ژیبکو رایو تن چھینی اوشوئے۔ ہے سورا ٹیپی قلمدارو تھوروا مڑاغ دم دیرو گوڑاک بتی اوشوئے۔ ہتے گوڑاکو ژیبکو خیال تن مہ ازگوٹھئیکو چقہیاو اوشوئے۔ مگم انتحانا پاس بکو بچے قلمدارو تھورومن گوڑاکو ژیبکار غیر کیہ چارہ دی نو اوشوئے۔ غیچھان نیشے لگینئیو تیرا تریتم۔ پھُک چھینی اپکہ خال اریتم۔ بیݰ کیہ ویخال متے نو سریتئے۔ ہار دفعہ غیچھان نیشئیاو دونین څریم کوری اخیر اسکولہ توری ہتو کھولیتم۔ خدایو مہربانی ہردی نو کوتیتئے، کیہ اوق نو پھریتم۔ اسکولہ توری دربت اچہ انتحان گاناک دی ہائے۔ نہ درونگ نہ بو بڑاڅ ݰیلی جوان غیچی ہائے۔ انتحان شروع ہوئے۔ اسپا دی تورتئے۔ کھیو بیتم کھیو نو مگم متے جم سریتئے۔ اردوو دی ریکو بیتم رے مت سریتئے۔ انتحان نسی نیسیکو چھٹی بتی دوروتے ہاتم۔ ہتے ویزینوت حضرت اللہ جان صاحب دی دورا بسو ہائے۔ حضرت اللہ جان صاحبو تت کوراغو خلفہ اوچ مہ تتو دورو روئیی برائے۔ البتہ ہتوچے سارغوزو پیرو رشتہ دارین دیتی  ایغو سو دورو روئیی اوشوئے۔ حضرت اللہ جان استاد سارغوزو پیرو جمار اوشوئے۔ وا مہ تتو چے پیرو  پیری مریدیو رشتار علاوہ دوستیو رشتہ دی اوشوئے۔ سارغوزو پیرو چے مہ تت ای مسی دی برانی۔ مہ تے یاد بوین کہ پیر مہ تتو تے برار رے لوا ݯوکاور۔  مہ تت لو دیاور کہ پیر ہتوتے " تو مہ مرید نو کیہ مہ برار" راوا برائے۔ مہ تتو اژیکو واقعہ  مہ تان نویشیرو کتاب " چارغیریو لال" و موژو نویشی شیر۔

ہترے اوہتی چھوچی نتیجہ نسانی۔ اوا پاس بیرو بیریتم۔ ہتے وختہ متے یقین ہوئے کہ مہ پاس بک ڈمبوز گانیرو دم دیرو تھورولامی گوڑاکو براکت ۔ اچہ پھُک فہمیدہ بتی مہ تے ہیہ شک دی ہوئے کہ حضرت اللہ جان صاحب مہ تتو سو دورو روئیو خطیرا کیہ مہ پاس کوری استایا؟ نو غیرت بیگ استادو ہتے لوظ مہ ݯونگ دیتی دیتی مہ ݯاکے محنت کورے مہ پاس اریرا؟ ہنیسے دی اوا فیصلہ ای نو ایوالو حقہ کوکو نُما بوم۔ ہتیغار اچی بونیو قلمدارو قدوردان ہوتم وا استاد صاحب حضرت اللہ جانو تابعدار۔ اچہ زمانا قلمدارو ای خور دعا دی بومی نو بغائے۔ اسپہ نوغ آباد زمینو بانگو ووݰکی پراشو "چوکیست" رے ای ݯھو ݯھو گول شیر۔ ہسے ہار سال ریشٹ گیتی اسپہ ژویو سٹھاوتئے۔ ای مکالہ مہ تت قلمداروتے عرضی اریر کہ ریشٹو بند کوریکو بچے دعا کورے۔ قلمدار مہ څیق تاتی شیرنبی خانو بندیتئے، " اے مہ پھوردو کورا صفا ژاغار چمخ بوہرتو انگیے" تاتی گانی الائے۔ قلمدار وا ہاݰ تن دم دیتی ہیزان سو کور ہتیرا پھویتئے۔ اچی مہ تاتیوت ریتئے، " اے مہ پھوردو ہمیتن کوس پونگ نو توریکو بݰ ژاغا التی ڈانگاوئے"۔ تاتی اہیی غوݯھارو ٹیکا کورا التی ہتے دم دیرو چمخ بوہرتن ڈانگے ہائے۔ ہتے انُس ہیہ انُس ریشٹ گیتی اسپہ کیہ نقصان نو کوری شیر۔