اسیرو زندگی۔۔۔۔۱۳

اسیرو زندگی ۔۔۔۱۳

  اویلو ݯھوغیار اچی وا کندوری ݯحوغی ارو رے ناگہہ کوس بشار کورارو گوئے، ہیرین دیتی اچھو ݯھوغیان لوو دک دی ضروری مگم ہنیسے نو دوم۔ ہار قصہ تان وختو سُم باو گوئے۔ فلحال اسکولو چے سبقو لوان دوسی کوریکوکہ ہتے زندگی مہ یادار نو بیران۔  ہتے جو تروئے سال مہ زندگیو جم سال نو اوشونی۔ مہ تتو چے مہ میکی حبیب اللہ خان کہ ہسے امیر نمو سورا زیادہ مشور اوشوئے او نسہ مہ تے نالائق رے غیرت بیگ استاد مہ بئیزت کوری پیڅھی استئے۔ ہسے مہ ژنہ گلمیخ بتی بہچی اوشوئے۔ تان نالائیقیو دودیری کوری تان عزتو بحال کوریکو بچے چھویو درونگار نشی اورارو پالیک تان ژاغا۔  تے اچتو ریزگیلئیو میکیو ومدار بتی غمژونی بہچیتم۔ ومداریار خلص بکو بچے تاندوری تن ݯھوغ دی چوکیتم۔ ہسےسُم جُستہ اردوا نالائیقیو فکر غیچہ اورارو اوئے۔ ہتے زمانو نو روخڅک کیہ نوژان نو۔ بریکہ پت نو رخڅم۔
۔
 جوو جماعتہ پاس بتی ترویا ہاتم مگم اردوو مہ سُم خروݰی تن بہچیتئے۔ نہ عبارتو پتہ دوم نہ ترجمو۔ املا ریکو بو دودیری لو۔ہتے سالو موژی ہونزیک استاد محمد کریم دی بدل ہوئے۔  ہتو ژغا ای نوجوان استاد ہائے۔ ھ نوغ استادو نم سید دینار علی شاہ اوشوئے۔ اسپہ تے لو پرانی کہ نوغ استاد اوشٹ جماعت پاس برائے۔ ھ خبارو دورا گیتی ننو چے تتوت ہاݰ زائیلہ پھریتم کہ ہتیت دی حیران  ہونی " اے نان! اے دادا! اسپہ تے نوغ استاد ہائے ہتو اوششٹ جماعت پاس برائے" اوشٹ راوا مہ ہوست مہ کپالار بو ژانگ نیسی اوشوئے۔ ہنُن زمانا پی ایچ ڈی  کوریکو دی کا ہرونی حیران نو بوئے۔ اسپہ تے ہاݰ سریتئے کہ اوشٹ جماعت پاس کوریک ہار ای والو کوکو بݰ کوروم نو۔ اسپہ ای جماعت دی نو راردو نن تتن حیران بک کیہ نوژن! ہتے زمانا اوشٹ پاس کورک اسان نو اوشوئے۔ دینارعلی استاد گیکار اچی اسپہ حالت پھوک پھوک بہتر باو ہائے۔ ہسے محنت کورک لائق استاد اوشوئے۔ ہتوغو محنتو روخڅین نو بوئے۔ اوا دورہ گیتی دی سبق ریکا پھریتم۔ یومونو چھویو درونگار وختہ پت نشی سبق یادیکا پھریتم۔ مہ شرین نن دی مہ سو ای بتی نشاور۔ پوݰپ دوماور یا گئیاور۔ مہ تے چھوئے بوتی دی کوراور۔ ہتے زمانا ہار دوری لاٹین نو باوتئے۔ اسپہ دوری جو لاٹین شاونی۔ مہ دادا تیل دی ٹین ٹینا کوری چھترارار انگیاور۔
  ۔ مہ شرین نن الف بے دی نو رے استئے مگم مہ ݯاکے سبق یادیکہ ہتو سفان سار زیاد کردار اوشوئے۔ اسکولار اچی گیکو ݰاپک مت دیتی راور کہ " اے مہ تات دی تان سبقان یاداوے" مہ ننو شرین ہمی الفاظ  ہنیسے دی مہ کاری گونی وا متے ہاݰ سریر کہ اوا ہتے  ترویا اسک پھوک ڈق ننو خوش، وخشی ۔

مہ دورو چے اسکولو موژی تروئے میلو پون اوشوئے۔ شیرین نن متے ٹٹالی کوراور وادی ݯی کوئے۔ تھ اسکولار نسی دوروتے گیاوا  رہو ݰویہ کیٹیمی شونجوران سورا حملہ کوراوتم۔ چوٹھان سو چھینی ہوستہ کوری ژیباو گیاو تم۔ کیہ زمانہ اوشوئے۔   ہتے سال یومونو  چوٹیا پاورتو بی عزیزمراد خان لالو چے ژانزہی میکئیوسار سبق گانیکو جاری بہچیتم۔ پروشٹی دی ہیہ لوو دیتی اسُم۔ ہرونی گداز بکار اچی دی مہ تے ہاݰ سرئیکا پرائے کہ اوا درست زندگی محنت کہ ارتم دی اردو ݯݯھک  بچے کشمیر فتح کورکو سار کم نو۔ اوہرتی بوسُن بکو اسکول بوݯھوری کندوری مودہ اچہ وا ای جوان ہیڈ ماسٹر اسپہ سار انتحان گانیکو ہائے۔