اسیرو زندگی۔۔۔۔۔ ۹

غیرت بیگ استاذ مہ تتو چے لوٹھورو برارو نسہ متے بو نالائق  برائے کیہ ریتئے گویاکہ مہ ہردیو ہاݰ څخمی اریر کہ ہسے ہنیسے دی مہ ݯھامیرن۔ ہتے وختہ متے ہاݰ سرے اوشوئے کہ زندگی شیکہ پت ہتو موختو نو لڑیم رے مگم اچہ زمانا ہتے ہردی چھینی نو بہچتئے۔ ہنیسے ہتے څخم مہ کہ ݯھامیرن غیرت بیگ استاذوبچے  دعا کومن۔
مہ نالائقیو ای وجہ کہ لاڑیمن خور دی وشوئے۔ ہسے مہ تتو نوغ آباد اوشوئے۔  چارغیریو غیرابادو آباد کوریکہ اوہ دی ہوست درونگیاوتم۔  خا ص کوری پھوردو بوئیک وا تیتان حفاظت کوریک مہ تین عشق غیریتئے۔ ہیغار علاوہ زمینداریو خور کورمہ دی حصہ گناوتم۔ سبق ریکو سار زمینداری کوریک مہ خوش اوشوئے۔ مہ شرین نن نیشی ریپھیکو مہ تے تہکیت کوراوتئے     " اے ننو تات تان سبقان یاداوے"۔ مہ دادا ہاݰ بیݰ کیہ زور نو لاکھاوتئے۔ زمینداریو کورمہ ہتو سو یاری دیکو  بو خوشان باوتئے۔ دادو  ہتے شریشتو کوریکار اوہ غلط فائدہ گانی سبقو ویلٹی توجہ نو دیکا پھریتم۔ خاص کوری اردوو کتابی دوسارو تن نو گیاوتے۔ اسکولہ ہنزیک استادو جٹھہ زبانو دی ہوݰ نو کوراوشتم۔ ہسے اسپہ ݯاکے نست انوسو سبقو دھرائی دی نو کوریاوتئے۔ غیرت بیگ  استادو ہتے لوظ مہ ݯھامیکو اردوو کتابو یی گانی خالی ورق دیاوتم۔ یومونو درونگ چھویو مہ نن نیشی چخور گیاور یا پوݰپ دوماور۔ اوہ دی ہتو گونہ نشی  لاٹینو روشتیہ سبق یادیکو کھوششو کوراوتم۔ شرین نن مہ تے چھوٴے بوتی کوراوور۔ زیات ہتے چھوٴے بوتئیو بچے نشاوتم۔ حساب، معاشرتی علوم وا اسلامیاتہ جم اوشوتم۔ مہ دݰمن اردو اوشوئے۔
کیچہ کہ پروشٹی ہیہ لوو دیتی اسُم کہ اوہ یومونو چھُٹیو موژی پاورتو بی مرحوم عزیز مراد خان و چے مہ میکی ژن زاہیو نسہ سبق راوتم۔ ہتے تھمام محنت مہ اردوو فروسکیکو نو بیتانی۔ ۔     بوسُن اسکول بو ݯھوریکو جوو جماعتو انتحان  ہوئے۔۔  مہ کیہ امید نو کہ پاس بوم رے۔ کوریکوکہ غیرت بیگ استاد مہ نالائقیو سندو دیتی استئے۔ ہسے نامی استاذ اوشوئے۔ انتحان ہتے زمانا زبانی باوتئے۔ ای حسابو نویشی  جواب دئیلک باور وا ای اردو املا باوتئے۔ ریکو نو باوا نویشیکو کھیو بومن۔ انتحان دیتی  اسکولو شرانہ تان جماعتیان نسہ نشی اسُم ہرونیہ ہونزیک استاذ ݱار ݱار اسپہ نسہ ھائے۔ گیتی تن مہ تے ریتئے۔۔۔۔۔۔۔۔