زندگیو ‏سفار ‏6

اسیرو زندگی   6

 کھوار راور کھوار نیویشور" تحریکو لوڵی اوا ہموݰ ارادہ اریتم کہ تان شوخڅیرو  زندگیو چھوئے انوسان اچی یادی انگیتی کھوار راکن سم تاریم۔ ہیرہ جو فائدہ بوئے۔ ای ہیہ کہ اسپہ پروشٹی وختو حالت نویشونو بتی تاریخو حصہ ساوز بوئے وا مہ تان زندگیو قف دوغور ݯاکیک ای شلوغ بتی نوغ دورو نسلو کارہ تارور۔ جوو فائدہ ہیہ کہ کھوار نویشیکوچے ریکو ویلٹی اسپہ خیال بیر۔ ہیہ بارا فیس بکہ دی جو کاٹَک نویشی استم کہ اوا تان بلاگہ نویشیم۔ لینکو دی نویشیراوشتم۔ پونج قسطان نویشیکار اچی مت ہاݰ سریران کہ کھوار راور کھوار نیویشور رے ہے لو صرف قلمی نغرہ برائے۔ کھوار راک بو کم یا مہ نویشیرو ویخال بے مزہ کہ دوستانن رارو نو گویَن۔  بہر حال اوا شروعے اسُم۔ ہمو بند نوکوم۔ پیسہ ریتامی یا نو ریتامی ہیس پیسہ چِت۔

 سال 1956 ستمبرمسی مہ تت مہ التی بانگو اسکولہ پیستئے۔ استاد محمدشیر مہ پہلیو جماعتہ نِشیتئے۔ ہتے زمانا پہلی جماعتہ عبارت ریک شروع باوور۔ اوا قاعدہ تن نو رے استم عبارتو کیچہ  کوری ریم؟ استاد کیاغ ریر نو ریر حرام بار کہ پتہ دوم۔ ہاݰتانچقہ حسابہ دی مہ ھ حالت تن بہچیتئے۔ زبانی سبقہ گزاران کوکا پھریتم۔ کلمان اوچے اسکوردی سوران یادئیک متے ہانی مشکل نو ہونی۔ استاد شاہ مسلم اسپہ اسلامیات ݯھیݯھیاور۔پہاڑان ازبریکا دی کیہ سستی نو ارتم۔ اردو مہ بچے زوم غیریتئے۔ دون ہتی نوتن ݯوکیکہ پرانی۔ ہیہ زائلہ چھوئَ آنُس پھار شوخڅاو ہانی۔ یومنو چھٹی بکو ژانوتے پھُک ارام ہوئے۔  بوسُن اسکول بوݯھوریکو ݰاو مودو موژی انتحان ہونی۔ اوا پاس ہوتم۔ متے تعجب سرِیتئے۔ البت  شک مضمونَن سورا مہ پاس ارینی۔ اردو  چے حساب تھ صفر اوشونی۔ اہرتی لالو ژاو بِک دی ہتے زمانا "قابلیت" اوشوئے۔  پاس بِکو مُݰقریو گانی دورہ تورتم۔ نن و چے تت ݯِھیُو ہونی کہ ہتیتان پھک ژاو جوا بغئے۔ تیتانتے کیہ پتہ کہ تیتان ژاو الف اوچے تھایقو موژی فرق نوکویَن رے۔ 
جوو جماعتہ گیکو محمد شیر استاذ بدل ہوئے۔ ای خور استاذ ہائے۔ ہسے ہونزِک  استاد نمو سورا مشور ہوئے۔ استادو کھوار جٹھہ اوشوئے۔ زیاد لوان ہُݰ نو کوکا پھریتم۔ ڈاقوتے ڈَک ریر۔ خانوتے کھان ریر۔ ژاووتے جاو ریر۔ ہسے گیتی دی مہ اردوو  فرسکیکو نو بیتئے۔ جوو جماعتو اردو پہلیوسار جو حصہ زیاد مشکل ہوئے۔ نآنگ بوسک کتاب باوُر۔ ہتو باریاو اسکولوچے دوری موژی کوسی ھ سال دی پھار شوخڅِتئے۔ ہونزک استاد اسکولو ݰویہ ای رضا لالو ژورو دی اوائے۔ اسپہ ݯاکے بوہرت سیرے تانتے ای جو قوشخانہ کوریتئے۔ ہیغار علاوہ یاردویُو ویݰے اسپہ ݯاکے بانگو اشپَشور بولان بونگان دی لیتئے۔ کیاغ کوکو نوبیتئے راویکہ ہسے ہیہ کہ مہ نالائقیو دودیری کوکو نو بیتئے۔ مہ موژہ قاعدو جماعتو څیقو بہکی قابلیت دی پیدا نو ہوئے۔