‏زندگیو ‏سفار 5

-
اسیرو زندگی   ۵ 
 پرکوسپہ گیتی ای کما بس اچہ مہ تاتی میر صاحب خان مہ التی پرکوسپو پرائمیری اسکولہ داخل اریر۔ ہتے وختہ اسپہ بابا شوکھور رافع ، گل مراد خان حسرتو تت ہے اسکولو استاد اوشوئے ۔ ای کما بسہ اچہ تن  مہ ہردی پھت بِک شروع ہوئے۔ نن، تت وا سپسارگینی ہردی گیکا پرانی۔اسکولو سبقو سو دی کیہ ہردی نو ݯوکیتئے۔ بابا استاد قہری اوشوئے۔ ڈاقن چملتوخیکو اوا بوہرتی بوہرتی فقط پوشی ژیریو غون ہوتم۔ بلبل صاحب خان براروسو ای بتی اسکولوتے بیم اچی گوم۔ دورہ ہار اشناری راحت اوشوئے۔ تاتی و چے چونجیک نن مہ بو خبارہ گیاو اوشونی مگم ننو چے اسپسار گینی مہ بو ہردیی گیکا پرانی۔ کوس نسہ لو دیکو دی نو بوم۔ شتغاو غونی ڈق اوشتم۔انُس شوخڅاو گیکا پرانی۔ ہتے زمانا بوسن شیتودریک مسی سخت بوݰی شاگل ہاݰ ہون ہائے کہ سینو بوتِکو چھت بتی چونجو موژتو غیرتئے ریتانی۔ سیدمنورشاہ پیرو ݯھیرانو گونجو ترینَن غانن سو ای کوری پریماڵی نیرو برائے۔ 
اوا موژغیشٹی تتیو نسو پوراوتم۔ چھویو کیہ ٹیمہ ہون ہائے رے قوژد بِکو تاتی مہ ڈوک کوری  التی موݰیچی نیتئے۔اسپہ دورو پروشٹہ اسپہ میکی نوازعلیو ٹھینگی زمینوتے موݰیچ راونی۔ ہیس ہوناری بچ بِکو بݰ ژاغہ اوشوئے۔ سف روئے تان دورو رویَن گانی ہتیرہ جمع ہونی۔ اوا تُق چن زپ انجِکی نو توری کندوری گھنٹہ ہتے بوݰِکو موڑہ بہچیتم۔ ہونو ہوازہ کم باو ہاٴئے۔ ہرونیا اچی دوروتے گیور ریکو ہتے ٹمٹنگو چھویو نو پوشی اوا تھرونی پولوغن موژو پازین پھریتم۔ ہتے ہونو وہمیا متے ہرونی ݯھامیک نو سریتئے۔ چھوچی روپھی لوڑتم کہ مہ پاز لیہ مڑاغ بتی شیر۔لوڵتم کہ ݯھوݯھو تھرونی ځوخ گل میخو غون مہ پازو ݯھوکی شینی۔ پھتیو نیتم وا پھتی اچہ ځخُم جم بِکو نسانی۔ ای مودا پت مہ چھامیتانی ہتے ځوخ دیرو ژَغہ۔ ہتے  کھوٹبوݰِک ہنونو چقہ مہ ہردی گوئے۔ بو درونگار  دی بہچِتئے وا ہون مون گیتی بو دیہہ تباہ دی ہونی۔ پرکوسپو گول ݰا گُل بو کوڵوم اوشوئے۔ ہتے ہون ہورو ٹیپے سورا نیتئے۔
گرݰپو چھٹی شوئیے اوشوئے ہرونیا چارغیریار مہ دادوتے لہاز بتی اسور رے خبار ہائے۔  سوت بسورتے چھُٹی گانی څیرو تاتی شیرنبی خان اسپہ گانی یارخونوتے رہی ہوئے۔ اوا، مہ لوٹھورو زیارت ولی خان و چے بلبل صاحب خان تاتیوسو ای بتی چارغیریوتے باتم۔ مہ تتو پوشی مہ کیڵارو ہائے۔ ݱوغ بتی فقط شوتور غیریرو برائے۔ ہتو لہازیوتے سیخچ نیشپوڑی شیر ریتانی۔ ہتے زمانا گیسو لہازیوتے نف ݯھومک وا سیخچ  نیشپوڑِک راوا برانی۔ سیدان تائیت کوراونی۔ تایتو کتابو موژو قسم قسم  قفان سونقشہ باونی۔ کھیوتے نف رینی۔  کھیوتے سیخچ رینی۔ ہتے نقشان لوڵی بوہرتوارو گیاور۔ نف  و چے سیخچ ݱینگئیاک واوگینی دی باونی۔ ہتیت ہوستان تیلمن کوری اݰکمو اف مژاونی۔ اچی څادارو یا پیٹیکو سیمینو کوری اݰکمائی بوتاوتانی۔ اسپہ چارغیریا تورتم کہ مہ دادا پھُک جم بِرو برائے۔
سوت بسوچھٹی نسی نیسیکو مہ لوٹھورو چے بلبل صاحبخان براراچی پرکوسپوتے  ھانی۔ اوا اچی گیکو نو زوئیتم۔ پرکوسپو پرائمیری اسکولہ مہ سبق ریکو دور اسکوردی بتی ہیرا نسی نسائے۔   
   گرݰپو چھٹی نَسی نِسِکو مہ دادا مہ التی میراگرامو اسکولہ پیڅھِتئے۔ ہیہ اسکول رحمت اللہ خان لالو حولیہ لوٹ بیرموغو موڵہ اوشوئے۔ استاد ایونو شیراعظم خان اوشوئے۔  ہسے اسپہ کئیو یعنی رحمتاللہ خان لالو اسپسارو موش اسپہ گومِت دی اوشوئے۔  لالو نن مہ تتو پھُک نیسیرو میکئیو ژوراسپساراوشوئے۔ اسپہ چارغیریا کیچ بِکو وختہ زندہ باستئے۔ بیڵو بار ڈقو اچہ ݯاکے اسپہ پورچھاو دی گیتی استئے۔ ای مسو چے پھت البت ہے اسکولہ ریکار اچی ہرونیا ڈقَن نیشیکیو موسم شروع ہوئے۔ چونجو استادن،  پردوم خِان و چے اقت خان تان دول دمامان گانی یارخونتو دورہ کوری رویِن ژیژاوان  ݰوڑیان دی چھیناونی وا بشے رویِن مشقول دی کوراونی۔ مہ دی ہتے بچے گانی چارغیریوتے اوانی۔ سوت سالہ بِکا پت مہ  دی نو نیشیرو برانی۔ ہتے زمانا جم جوان بِکو نیشئیاوتانی۔  ہتے اپریشنار جم بِکو بانگو اسکولو استاد سید محمد شیر گیتی مہ تتو موڵہ اوتی تہ ژاٷ پہلیا داخل کوم رے مہ التی بانگو پرائمیری اسکولو پہلیوجماعتہ داخل اریر۔  پرکوسپوچے میراگرامو اسکولو موژہ بِتی حوُل  قاعدوالف بان، ے پت رے استم۔  قاعدو نو ریکا پت عبارت خوا نی شروع بِکو تھ دنیا مہ سوری پرائے۔

Comments

Post a Comment

Popular posts from this blog

کیچ بِک

-
ہمارے بچپن میں "کیچ بک" (kech bik) بھی ایک اہم مہم ہوا کرتی تھی۔ بہت سے لوگوں کے دو دو مقامات پر زمینات اور رہائشی مکانات ہوتے تھے، ایک سرمائی اور دوسرا گھر گرمائی ہوتا تھا۔ ان گھروں کے مکین و مالک گرمیوں میں زرا ٹھندی جگہوں کی طرف چند مہینوں کے لیے منتقل ہوتے تھے اور گرمیاں ختم ہوتے ہی گرم گھروں کا رخ کرتے تھے۔ اس انتقال مسکن کو کیچ بک کہتے ہیں۔ آج کل بہت کم لوگ اس طرح ایک گھر سے دوسرے گھر منتقل ہوتے ہیں کیونکہ آبادیاں بڑ گئی اور زمینات کم پڑ گئی ہیں۔  اس لیے لوگ سرد گاونوں میں بھی مستقل رہائش رکھنے پر مجبور ہوگئے ہیں۔  کیچ بک ایک مہم ہوا کرتی۔ ہفتوں پہلے نیک ساعت معلوم کرنے کے لیے اس ہنر کے ماہرین سے رجوع کیا جاتا۔ گاؤں کا خلیفہ یا مولوی یا بول حساب (ستارہ شناس) مناسب دن اور وقت کی نشان دہی کرتا۔ پھر گھریلو سامان کی پیکنگ شروع کرتے۔ مجھے ملازمت کے دوران اپنے ہر تبادلے کے وقت یہ قدیم مہم یاد آیا کرتی تھی۔ کیچ بک کے دنوں قافلے کے قافلے ایک گاؤں سے دوسرے گاؤں کی طرف رواں دواں نظر آتے ۔ ان کے قافلے میں گدھوں اور گھوڑوں پر گھر کا سامان بستر اور گھریلو برتن اور استعمال کی دوسری چ
Read more

باران رحمت کی زحمت

-
ان دنوں مستوج، لاسپور، یارخون اور موڑکھو اور تورکھو کے بالائی علاقوں میں خوبانیوں کی بہار ہوتی ہے جب خوبانی کے پھول کھلتے ہیں جسے ہم کھوار میں ژوڑسپرو کہتے ہیں۔ خوبانی کے پھولوں کے گرنے تک بارش خوبانی کے پھلوں کے لیے انتہائی نقصان دہ ہوتی ہے۔ پھل بہت کم لگتے ہیں اور زمیندار کو بڑا خسارہ ہوتا ہے۔ وادئ یارخون میں گزشتہ 72 گھنٹوں سے مسلسل بارش برس رہی ہے اور موسم بھی کافی سے زیادہ ٹھنڈا ہوگیا ہے۔ آج رات تھوڑی برف بھی پڑی۔ خطرہ ہے کہ خوبانیوں کے پھل لگنے کا عمل بری طرح متاثرہوا ہے۔ امسال خوبانی کے پھلوں سے محروم رہ جانے کا حدشہ ہے ۔  گزشتہ تین چار سالوں سے ہم خوبانیوں سے کوئی فایدہ نہیں اٹھا پا رہے ہیں۔ کبھی بے وقت کی بارشوں کی وجہ سے پھول اور ننھے پھل گر جاتے ہیں اور کبھی غیر متوقع موسمیاتی تبدیلیوں کے نتیجے میں خوبانی کے پھل پکنے کے عمل کے دوران سڑنے لگتے ہیں۔ محکمہء زراعت بھی اس سلسلے کوئی تحقیق نہیں کی کہ خوبانی اور سیب کے پھلوں کے سڑنے کی وجہ کیا ہے؟ مجھے ایسا لگتا ہے کہ یہ جو کچھ نقصان ہم اٹھا رہے ہیں یہ ہماری ناشکریوں کے سبب سے ہے۔ ہم اپنے پھلوں کی قدر نہیں کرتے اور اللہ کی ان بہتری
Read more

شرط بزرگی

-
بعض لوگوں کا خیال ہے کہ عمر کے بڑھنے سے انسان عقلمند ہوتا ہے۔ اس خام خیالی میں عقل کے پیادے اپنی عمر کی درازی کو دلیل بنا کر کہتے ہیں کہ " میری عمر پچاس ساٹھ سال ہے۔ میں بچہ نہیں رہا ۔ میں عقلمند ہوں" یہ احنقانہ دلیل ہے کیونکہ عقل کا تعلق بڑھاپا سے نہیں ہوتا جیسا کہ شیخ سعدی علیہ رحمۃ کا کہنا ہے،   توانگری بہ دل است نہ بہ مال بزرگی بہ عقل است نہ بہ سال  لہذا نہ عقلمندی کا تعلق بڑی عمر سے  ہوتا ہے اور نہ مالداری کے سبب سے کوئی شخص دولتمند کہلا سکتا ہے۔ چھوٹی عمر کا فرد بھی بھی اپنی عقلمندی کی وجہ سے بزرگی کا مقام پا سکتا ہے جس ایک طرح غریب آدمی اپنی سخاوت کی بدولت دولت مند کہلانے کا حقدار ہوتا ہے۔
Read more