زندگیو ‏سفار ‏4

اسیرو زندگی   4

 ھ سالو گرِݰپٷ دی چارغیریا شخڅے شورو بِکو مہ نن تت اسپہ گانی اچی پرکوسپوتے رہی ہونی۔ اسپہ دورا ای وخیک واو چو تو ژاو لولونمیں اساونی۔ لولو مہ سار کیہ پھُک رو لوٹ اوشویا۔ دورو وا مال حالن ہتے واوو ہوستی کوری، خرچہ خوراک ہتوتے پیڅھی  دورار رہی ہوتم۔  اوا و چو مہ لوٹھورو کئے ہرونی خوشان اسوسی کہ لو  دیتی اہیی تاریکو بݰ نو۔ تان اژیرو بوردیرو دورو، برارگینی اسپسارگینَین، تاتی یانِن وا نن گینیَن ، تان دیہو نن گینی تت گینیَن  وا اشٹوکو یاران بچے بو ھردی پھت بتی استم۔ اسپتے ہاݰ سرئیاو اوشوئے کہ اولی کہ اف تروسی۔ ننو چے تت ہاݰ لو دیتی استانی کہ ای کما بس اوھرکنہ بتی پرکوسپوتے بسی۔    دورار  یو نسی اسپہ جوالی نست نسی یو ھاتم۔ اسپہ اچتو مہ نن اسپہ سفان سار پھُک   اسپسارو بیڅ کوری مہ سورا اژیرو ہوستہ ݯوکی ہتے اچہ مہ تت استورو بتینہ کوری گیتی پیݯ گوڵو خومِکو اسپہ خونځا رے اسپسار ݰا ہواز نے کیڵتئے۔  ہسے څیقی گانی کیڵَک اوشوئے۔ خونځا نمو دی بو کیڵاندرو بِکین مہ تت ہتوتے لکھی استئے۔ ہرونیا مہ تت خبار گانتئے  کہ ہیس کھیوتے کیڵیرَن۔ مہ نن ریکی ہیہ نو بسی ران۔ مہ تت توغو فنا فانی کوری پھِکئیکو کھوشش اریر مگم نو بیتئے۔ ہرونیا مہ تتو قہر ہائے۔  تو ای چمالتوخ پرائے۔ کیہ بوہتونئیو سورا پھِک بویا ریکو ہسے ہتیغار دی دوڵ ہواز نے کیڵتئے کہ زوم کڵوپ ہوا پرانی۔ اسپہ ہتے اسپسار پیݯ گوڵہ یو غوزار  لاکھیک مہ ماریک ریتئے۔ ای مودہ جنگ جفار اچہ مہ تت اعلان اریر "اچی گیور، جنگ جفا کوری سفار کورین نوبوئے"۔ اوا و چہ مہ لوٹھورو کئے اسمانار لشٹہ پھریتم دیا۔ ھ وختہ اسپہ تے موقع کہ نِسیسیر خونځو بوکھو پیڵیسام۔ 

 قدرتو فیصلہ برائے،اسپہ پھُک اسپسار بہنہ ہوئے کہ اسپہ ہے نوغ بیابانہ حال بیلِک ہوئے۔ کوریکو کہ ہیتے اَنُُس اچی کیہ باتم زینتاڵ دیرو غون ہتیغار نِݰی نیسِک مہ نن تتانے نصیب نوہوئے۔اوا ہنیسے دی کیہ وت کیہ وت تان ہے اسپساروت گلہ کوم کہ تہ وجہیں اسپہ یارخونِک ہوتم۔ ای  بیابان ہونو موژہ زندگی اریتم۔ ہیہ لو حقیقت کہ چارغیریو آباد  کوریکا مہ ننو چے تت کیہ مشقت کہ بتی اسونی ہتو اندازہ کورین نوبوئے۔ اوا و چے مہ څیڅیق  برارگینی دی ہیرا بے نس مشقت بتی اسُسی۔  جم مہیرگین نن تت وا ژیبِک پیک راحت بِکیندیتی اسپہ ہرونی تنگ نو ہوتم۔ کو نو غیری، ژندار غری نو بتی، آئی جِنگوغ اسپہ نو اکریݯی بوردیتم۔

اِسکولی ڈَق

 ہتے یومُن نِسی بوسُن بِکو مہ موژغیشٹی تاتی میر صاحب خان اہیی گیتی  اسکولہ پیڅھیکو بچے مہ گانی پرکوسپوت الائے۔ بانگہ دی اسکول شروع بیرو برائے مگم ہتو دودیری جوݰی مہ تاتی ریکی " مہ ݱوغ ژاو بی گیکو نوبوئے، پرکوسپہ اسکول ݰوئیی ، تان ژاوو  اف تان الوم"۔ مہ شیرین نن مہ سار نو باو اوشوئے مگم مہ سبقہ پیڅھیک دی ضروری اوشوئے۔ہیرین دیتی ہریو ٹیکا بوہرت لاکھی مہ ویݰیتئے۔ اوا تان پرکوسپو دورو وا برارگینی اسپسارگینین بچے پلاوار بیتی ستم۔ تاتیوسم خوشانین رہی ہوتم استورو پروشٹہ پیڅھی مہ گانی رہی اریر۔ ہے سفارو باقی حصہ مہ یادی نو گوین۔ اچہ معلوم ہوئے کہ ہیس اپریل مس برائے۔