زندگیو ‏سفار ‏3

 اسیرو زندگی۳  

مہ بابا لیڈر، څیرو بابا غیڑی ڈوم وا مہ تت استوران سورو اسپہ پروشٹہ بیارہ پیڅھی کڵیڅ کوڵومو 

پروشٹہ تھورتہ اسپہ بنگوویلٹی  نیتانی۔ سین ہرونی ٹِپ بتی اوشوئے کہ استوران سغری مال اریر۔ اسپہ ڈیک زنہ پت ځہ ہونی۔ ہتے انُس اوا توری بانگو وارزا آخری کوشُنو نِݰیار ژانَک ہوتم۔ اچہ معلوم ہوئے کہ ہے ژاغو نَم کڵیڅ کوڵوم براٴے۔ کڵیڅ کوڵومار ای میل غونی توری بیی چارغیریو تھیسو کاردو دورا تورتم۔ بو نمونا سریتئے۔ قاق ریزگیلی بیابانو موژہ ، ژانگ زومو گوݯی، سینو ٹیکا تروئے بشیر فُٹار دی ژانگ زومالو ٹیکا چَن غیژی دور۔ اہیی لوڵیکو ای میلہ دودیری پھُک دیہہ پترانگاز، اچہ ہو نموݯھݯھتَم۔ موڵی کوہو ویلٹی  لوڵیکو ڵانگا ہون، یور اف غیریکو ویݰکی سورو غیریکو چَق اوندین  زوم، یور یی نیسیکو ویلٹی گوݯو یارخونو سین اوجوݰُم۔ کان نمے ای کما نوغ بوئیرو لاو نو پَشیرو ہولولُو پھوردو دورو حولیوسُم چوکیرو پھت ݯاکے غونی اندرینی دیرو ای خور حولیو  جومرݯ،چھور  پلوغ، وا ای بیرموغ۔ دورو موڵی ویلٹی جو تروئے  ژوڵی پھوردو۔ وا ای کما تیرکو چے تیلی پھوردو کہ تیتان موڵہ ای والو چھاغ بِکو بݰ دی نو غیچی ہانی۔  دورار پھُک توری بیی اوڅھو سُم ای ݯاکے غونی ٹھینگ گاز ہے بیابانہ خدایو ویلٹیار ای لوٹ نعمت سریتئے۔ اسپہ ہوستہ ݯوکی گوݯو پوئے پونیار اہیی نے دورہ اوانی۔ لوٹ دروازا اہیی اوتیتم کہ ای څیق رو حولی۔ ختانو پروشٹہ سَروزو کمبوخَن یعنی غونڈولیکان  سورا ݰہخچ۔ ای ختان راتھینی تیاروا ہتے گُݯتو بئیپَݰوکھانج دی اہیی نیزی شیر۔ مینوان ای قوشخانہ دی تیار برائے۔ ہیتَن سار علاوہ ای گونج وا شال مودی دی تیار برانی۔

حولیو ہتے بیریو دواہتہ اف نیسیکو ہمت نو بیکا پرائے۔ ہاݰ سریر کہ ڈیل دیتی سینو غیرتم رے۔اسپہ پرکوسپو غون لشٹ پرانو دورہ اژی بوردیرو څیڅیقانتے ہیہ نوغ دورنواہڅ ادرخ سریتئے۔ شرین نن تتان سُم ای بتی  ہتیتان ہمتو سورہ زندگی کورِک شروع ارتم۔ وا ہیہ لو دی اسپہ کرہ دیتی اوشوئے کہ      ای جو مس اچہ پرکوسپوتے اچی بسی رے۔

کیچ بیکو ژیری ارینی۔ بو روئے بمبارکوھانی وا ژیری ژیباو بغانی۔ مہ ہتے رویان سُم کیہ بالَتی نو بیکین دلچسپی دی نو ہوئے۔ ہیغین ہتے روئے مہ ہردی نو گونی یَن۔ ای جو بسو موژی پھتی رویَن ہوݰ کوریکا پھریتم کا کہ اسپہ دوری زیاد گیاو اوشونی۔ کڵیڅ کوڵکومو بپ دولت ہتیتان موژار ای اوشوئے۔ اسپہ ݰوئے گرامبیشو نمے دی ہسے اوشوئے۔ ہتے بپو ژاو زار مہ عمرو بِکین مہ اشٹوکو ملگیری ہوئے۔ ہتو لوٹحورو برار سلیمانی دی کیہ وت کیہ وت اسپہ سُم یار بِکا پرائے۔ اسپہ ہتے اوڅی بی ژوئے نیزی خورا کوراوتم۔ تیریکو لینݱو نوکھی کوسی وا باریکی چوٹھَن چحَمیڵل کوری ایغو موژی نیزی بِٹونی ساوزیسی۔ کحوشنالاکن بخ نیزی خورا بوہرتو کوسی وا ݯھوتی ہتے ٹیکا دراو خورا پیݰیسی۔ ہیس اسپہ کحلی اشٹوک اوشوئے انُس چحاغ دیکا پت توقہ مڵاغ بتی ہے اوڅو بہچاوتم۔

 اَپَکین یوری

ہیہ قاق ریزگیلی غیژیغاڵ دورہ میوہ ریکو دودیری اشناری کانو چھاغ دی ارمان ہوئے۔ یوروان مس اوتیکو اسپہ شُم حال ہوئے۔ شیرین نن چھیرو خوراکان سورہ اسپہ دلاسہ دیاو الائے۔ بابا لیڈر مرݯ ݯھانے ویݰکو کوری تان ݯھیر ژاو گِنیانتے دی پترنگازو پروشٹہ تیلی سیرین نیزے اسپہ تے انځیکا پرائے۔ کیہ وت یورمس خان وا کیہ ہتے ای میکی بارے گانی گوئے۔ ݯھوٴے سوت بسہ ایک بیڑو بار ایمیتو رہتو اہیی بیر۔ اسپہ ݯھیُو بوسی  کہ میوہ ھانی۔ ژوڑیو ڵاٴے بِکو ہتے ویݰکوا ژوڵی گیکا پرانی وا پلوغ پوچی بِکو پلوغ گیکا پرانی۔ مہ شرین نن ہتیتَن لاکھاو مدیریا اسپہ تے دوئے۔ اللہ مہ بابوتے وا ہتے ݯحیر مک گینیانتے جنت نصیب کورار۔ اسپہ بو خبارہ گیتی اسونی۔ بپ دوریو میوان سار علاوہ یارخونو حکم لنگر مراد خانو، تو برار عبدلجہان خانو، فیض علی خان لالو، سلطان یعقوت لالو، ڈامو لال مݯھی خانو ، کڵیڅکوڵومو بپو، زیرت پناہ شاہ جیو، پترانگازو خانومان لالو، قاضی تکبیر شو، شاہ جی صفدرو دورار دی میوہ اسپہ تے انگیاو اوشونی۔ خداٴے بدل دیار۔