اسیرو زندگی ۲

اسیرو زندگی۔ ۲  

ژنو خطرار نیسک

ای سالہ اسیکا دِش لہاز بیرو بریتم۔ مہ سُم جُستہ مہ لال اقبال خانو مہ یار ای ژاو دی مہ قسمہ لہاز بِرو برائے۔ ہتو دورو چے اسپہ دور ایتو ݯوکیرو اوشونی۔ روئے راوستانی کہ ہمی جو څیڅیق بچ نو بونی۔ مہ نن تت دی مہ سار اپَک پارویلیرو برانی۔ ہے موژی مہ ہتے یار نویس شوخڅیرو برائے و مہ بریکوت غیچ څِپھے استانی۔ ہاݰ بتی کندوری مودہ بریک پونی بہچی جم بیرو بریتم۔

جٷ ژنو خطرہ مہ تان نو تھیلِکین بتی اوشوئے۔ ہسے مہ جم یاد بوین۔ ژوڵی پوچی مس اوشوئے۔ مہ نن او چے اقبال خان لالو اݱغال کہ اسپہ ہتوتے دی ہتو آژیلیَن لوا  لوٹ نن راٷتم،اِستانہ چمبور دراٷ اوشونی۔ اوا ہتیتن نسہ اشٹوک کوراٷ اوشتم۔ ہے استانہ ای کھول دی شاٷر۔ مہ خیالہ ہنیسے دی شیر۔ کھول شالان استانہ ساوزے اوشوئے۔ ہے کھولو سوری دروݯھو مژی بولونجی اوشوئی۔ ہتے مِژیو ٹیکی څدار و خور زپ یورے اوشونی۔ اوا ہتے سوری بی ہتَن لیݯھیکا پھریتم۔ ہتے مستیو موژی شالو کماڑو ݯھونِرو بریتم۔ ہتو ڵپ ارتم۔ سیدھا پونگواز بی اخرو ٹیکا پھریتم۔ ژریغ کوریکو زوم کڵوپ ہوا پرانی ۔ مہ شیرین نن اشرو غوݯھار بتی مہ سُم تورتئے۔ مہ نسکار ځخمی بتی لئے غوݯھار ہوئے۔ مہ نن کو کیچہ اریر ہتے لئیو چھینتئے۔ مہ خور کیاغ ځخمی نو بیرو برانی۔ کپھالین اف دیرو ہسے مہ اجل اشوئے۔ مہ نن کھومون مہ گوڵو درے مہ فان دیتی پھِکیتئے۔ نسکار کافی ځخمی بیرو برائے۔ ای مودا پت مہ ݯھامیتئے۔ہتے عمرو خور کیہ واقعہ مہ یادی نو گونی۔ 

یارخُونِک

ݯھوےٴسالہ بِکو مہ تت اسپہ گانی یارخونوت بغےٴ۔ ہیغار پروشٹی دی کندُری دفعہ بی اسُم مگم ہتے سفار مہ ہردیی نو گونیَن۔ مہ شرین ننو تتو دور میراگرامو اوہرکنہ شیر۔ اسپہ ہار سال یومُنین ننو سم بتی بپ دوریوت بوغاوتم کوریکو کہ قدیمہ ژور گِنی یومُن بکو تتگِنِیَن دورانتے بِک ای عام رواج اوشوۓ۔ ای مس یا جو مس تتو دورا شخڅے بوسُنو زمینداری شروع بکار پروشٹی اچی تان دورانتے گیاونی۔ خاص کوری ٹُھنگشل و چہ پھیتِنگ مسان تان اژیلیان گانی تتو دورا لشٹَیِن وچہ پرانو دونَن ژیباو شخڅئیاونی۔ اگرچہ خدایو مہربانی وا مہ نن تتَن محنتو براکتہ اسپہ دور ہار قسمہ نعمتار ٹِپ اوشوئے مگم بپدُوریو خال خور وا۔ مہ بپدُوریا دی کوماڑین تیل لوچھاور۔ پوشوروچے دونو حد نو اوشوئے۔ مہ واوی اوچے بابا کھاڑ محنتی لائق زمیندار اوشونی۔ پالوغ ای گونجا کوری لاکھاونی ۔ یومُن نِسیکا پت پولوغ ژیباوتم۔ کیہ ہاش مہارتو سورا لاکھاونی کہ ہتے پلوغ خراب نو باوتانی۔ مہ بابا فراست بیگ  لیڈرنمو سورا منشور اوشوئے وا پھتی روئے ہتوتے پولیس دی راونی کوریکو کہ ریاستو زمانا یارخونو پولیس برائے۔ بابافراست بیگ تان قامو لوٹھورو وا سفان سار لوٹ جاگیردار دی اوشوئے۔

یارخونو مہ ہے سفار شروعہ اوچہ موژہ موژہ مہ یاد بویِن۔ پرکوسپار رہی بِتی خدایار کورِک مہ څیق ننگِنِیَن تاتیانَن وا برارگِنِیَن اسپہ اچہ پھیشنگ بِک مہ تے جم یاد۔ اسپہ یارخونوت بوغاوا بپ دُریو شوقہ ݯھئیو بتی بوغاوتم۔ مہ بابا لیڈر دِش فہل موش اوشوئے۔ بیرئیو کیہ دورو روۓ تو پوشی بُہرتُواونی مگم اسپہ خوش دراٷر۔ اسپہ سُم کیہ وت کھوٹ بِک مہ ہردیی نوگویِن۔ مہ واوی اسپہ بچے فقط گدیری اوشوۓ۔ مہ ننو نن گل مراد خان حسرت صائیبو تتو لوٹھورو اسپسار اوشوۓ۔ مہ تتوچے ننو رشتہ دی ہے بنیادا برو براۓ۔   

ہے سفار پرکوسپہ دورار رہی بک وا اچی اسیروان سُم خدیایار کورِک مہ ہردی گوئے۔ اشپیرزومیو گوݯتو بوغاوا مہ پھُک  اسپسارخونځو کیڑِک وا ہتو ڈوک کاردو اقبال خان لالو ہیہ لو مہ یاد،” متے ضرور کوریکو تہ کیچہ کوم مہ اسپسار؟ مہ پُھک اسپسار درونگار ڈوک بتی تنگ بتی مہ روپھے ڈوک کورے راوا برائے۔ اوا تتو استورو پروشٹہ نِشی استم وا مہ لوٹ  کئے بابا غیڵی ڈومو بیارا نشی استئے۔ غیڵی ڈوم بابا مہ ننو مِک اوشوئے۔ سفان سار پھُک ننو کوݰکی استورو ٹیکو نشی استئے۔ چھوئے بیکو اُہرکنہ تورتم۔ مہ بپ دوریا اسپہ بیچی، میر نواب خان پریماڑچیواݱغال مہ سار پھُک زاق اوشوئے۔ اسپہ اشٹوکئیاوتئے۔ مہ میکی حاکمو ژور زہرہ، سلطان ولی شاہ لالو اݱغال مہ ہم عمر و اشٹوکو ملگیری اوشوئے۔ مہ عمرو ای ڈق مہ ای مکئیو ژاو گل نیاب خان اوشوئے۔ ہسے مہ گانی بو اشٹوک کوراٷر۔ مہ بابا جو لیلوٹ گرزین شاونی۔ ای دوروسُم ݯوکی تن وا پھُک رو دودیری۔ ہار قسمہ میوہ زار کان ہتے گرزینین شاونی۔  

ہتے یومُن نِسی بوسُن بِکو اچی پرکوسپوتے گِکو ژاغا مئی مسی تتو نوغ آباد کاردو دور چارغیرئیوتے باتم۔ اچہ حساب ارتم کہ ہسے 1955 و شیتودریک یعنی مئی مس برائے۔ تھورت دوسی اوشونی۔ اسپہ تھورتہ پھار نیزاوا اوغ مہ ڈیکَن ځہہ اریر۔ جاری شیر