اسیرو زندگی - ۱

   

اژیک

  اژیکو تاریخو کا نو نویشیرو برانی۔ ہتے وختہ نویشاک دی گہہ نہ گہہ کورا استانی۔ مہ اژیرو وا بپانہ دیہہ پرکوسپہ دی قاضی شاہ کریم ،بابا شوکھور رافع  منشی خانمان اوچہ مرزا ہادی سبق راردو برانی۔ اژیکو تاریخ نویشیکو کیہ رواج نو براےٴ۔ اسکولہ پیڅھاوا 13 اپریل 1949نویشیرو برانی۔ مہ تت  لال لغل خان راوتےٴ کہ "اسکردٷ جنگ جاری اوشوےٴ۔ݯھترارار اسکردوتے بوغاک جوو بولو موژہ مہ نم دی براےٴ۔ مہ  دی مشکی ݯھتراروت انگیتی استانی۔ اسپہ پھاریو تیاریا اسیتم ہرونیا ای انُس مستوچار  ٹیلیفون ہاٴےٴ۔ مہ تے مݰقری پرانی کہ تہ ژاو اژیتےٴ۔ اوا خوشانیو سم جوستہ بوتنگ  دی ہوتم کہ دریغا تان ہے ژاٷ موخو پاشیمانا نوا۔ ہتے جو تروےٴ بسو موژی اسکردو فتح ہوےٴ رے خبار ہاےٴ ۔ جوو بولو ویݰیکو ضرورت نو ہوےٴ۔ اوا ݯھیو بتی دورتے راہی ارتم۔ دورہ توری تہ اژیکو ژیریو پھریتم۔ ہسے مرݯ پوچی مس اوشوے" مہ تتو یادہ شیرو ہیہ وخت صحی بوےٴ۔ اوا 1948و جون مسو شروعہ  اژیرو بوم۔

پرکوسپو موژو دیہو وارزو دورہ ہتے ختانی اژیرو بیریتم کہ ہے ختان پرکوسپہ اسپہ سرنگے زوندرے بپ گینین کاردو دوران موژار جٷ یا ترویو دور بوےٴ۔ څیق سرنگو ژاٷ یا نویسو کاردو ختن بوئے کہ ہتے زمانا اسپہ بپ گِنی وختو متارانن غیچہ دوݰ برانی۔ مہ تتو بابا میر جہاں یا میرجان کہ ہسے میژن نمو سورا نمئیونو باوا برائے تان برارگینین موژی څیرو بکین ہے ختان ہتوتے توری شیر۔ اچی مہ بابا شوکھور خان څیرو بکین ہتوتے توری شیر۔ مہ تت راور کہ بابا شکھور خان اݰکمین دخمہ برائے وا تو آژیلی یعنی مہ تتو چوت شاریغ بکین بابا ہے ختانو پولی پرانو جوݰی تانتے ݯھوݯھو گولو ٹیکا دور ساوزیرو برائے مگم تو برارو ژیژاو ہتے سورا قبضہ کاردو برانی۔ ہاںُنار شور سال پروشٹی پرانو پُلی ختان کم سی کم جو شور سال قدیمو بوئے تن۔  ہے ختان ای شڈال ختان۔ موش کو ریکو مہ تت راٷر کہ جم ڑایے ختان کوریکو متاران زوپھے الاوا برانی۔ ہے شڈال ختانی کندوری روےٴ اژی اسونی ہتے موژار ای اوا دی۔ ہے ختان مہ څیرو تاتیوتے توری اوشوےٴ۔ ہسے ہتوتے اسپہ بپ گینین یادگار رے زوپھیکو نو لاکی ہمونیا پت ہتے قدیمی شکلہ زندہ شیر۔ ہنیسے مہ څیق تاتیو څیرو ژاو شریف نادر خانو سم شیر۔

اسپہ تتو میکو ژاو محمد خانو اژغال تھورجالیک نن راٷر کہ "تو مہ پھنہ اژی اسُس کیہ مہ ژاو وا نم دی اوا تتے لاکھی اسم" تھورجالیک ننو ژیژاو یعنی اسپہ لالگِنی  شیر محمد خان، شیر نواز خان اوچے شیر عزیز خان اوشونی ۔ ہیتان نمو چے مہ لوٹھورو برارو نمو ایگان نسان ایتو ݯکے متے شیر ولی خان نم لاکھِرو برائے۔اوا تان تتو چھورو وا ننو جٷ اژیلی۔ اسپہ لوٹ ننو سار جو ژیژاو آژیرو برانی۔ اسپہ سفان سار لوٹھورو برار پھوکیہ تن شوخڅیرو براےٴ وا ہتو سار څیق اسپہ لوٹھورو برار ریٹائرڈ آرمی حولدارزیارت ولی خان  پرکوسپہ دوروینی اسور۔

مہ پھوکی

 پھوکیو ای کما واقعہ مہ جم ہردی گونی۔ ہے واقعات مہ عمرو سالو چے پھتار گنی جوش جوہجو سالو موژی شینی۔ مہ اَوسیکیکو زمانہ ہانی مہ ہردی گوےٴ کہ مہ شرین نن مہ ای بازو بیڅ کوری ای ہوستہ ݯھیردان کوری مہ تتو دوکانی بوغاٷر۔ ہتے دوکان دی دورو حولیو اندرینی ای گوݯہ شاٷر ۔ ہنیسے دی ہتے پھوک ختان تان ژاغا شیر۔ ہے دوکانی دواہتہ اہیی اوتی کھوڑیو ویلٹی ای غوریر شاٷر۔ ہتے غوریرو بِریرُو دُورو دون باٷر۔ مہ نن ڑیخو سورا چھنی ہتےغار یی نیزی ہتے ݯھیردانہ ٹپ کوری دوروتے انگیاٷر۔ جنت نصیب بکومہ نن  راوتےٴ کہ "ہتے ݯھیردانہ دونو تو ای چھوےٴ انوسو موژہ کھُلیئاوتاو"۔ اوا ننوسار خبار گانیتم  کہ " اے نان چوبیس گنٹھا ای کلوار زیاد دونو کیچہ ژیباوا بریتم؟" مہ نن راٷر کہ  "بوزو چے شینیکار غیر کیاغ نو ژیباوتاو۔ ہسے دی بے ٹیم بے ٹیم" 

موخ وچہ کپال نگیک مہ دش اوشونی۔ نن مہ دوسی سورو موڑو کوری  زنو ٹیکی پیڅھی مہ کپالوچہ موخو نیگاٷر۔ مہ شرین ننو ہے کوروم مہ بو دش اوشوےٴ۔ مہ دم چک بیرو غون سریاٷر۔ ہنیسے دی مہ ہردی کہ ہاےٴ مہ ھردی برق پھت ہوےٴ رے مت سرئیر۔ ضدی څیق اوشوتم۔ نو کوریکو بش کورمن کوراٷتم۔ ای دفعہ کوتیرو ہوستہ کوری شانی اسُم۔ کوستے نو دومن۔ نن اشقالی اریر وا خور دی کا مہ سار گانیکو کھوششو ارینی مگم نو بیتانی۔ ہرونیہ اسپہ ای اڑغانی گومت ہاےٴ۔ مہ تتو میکو ژاو برارو جمار براۓ۔ ہتے وختہ ہاݰ کیاغ ہُݰ نو کوراوتم۔ ای اڵغانی اسپہ دوری گیاور ۔اچہ متے پتہ ہوےٴ کہ ہسے اسپہ گومت اوشوےٴ رے۔ ہتے انُسار اچی ہتے اڑغانی مہ غیچی نو ہاۓ۔ معلوم ہوۓ کہ اسپہ کایو مہ تت  ہتو سار نیزیرو براۓ۔ تھہ ہتے اڑگانی مہ فان دتی کوتیرو مہ سار گانیکو کھوشش اریر۔ ہتو الفاظ ہانُنو غون مہ یاد۔ مہ تے ریکی ”ڈقانو پھُک ڈقانو کوتیر متے راکہ۔ ڈقانو جم ڈقانو کوتیر متے راکہ"۔  خۓ اوا کوتیرو تان  شیرین ننوتے نو دیاوا اڑغانیوتے کورا دومن۔ نو پھریتم۔ اڑغانیو فان دک مہ سورا کیہ اثار نو اریرالبت متے ہانی فاِئیدہ ہوۓ کہ ہے ہانی اولانو اڵغانیوار مہ یاد بہچتۓ۔

مہ ہے نافہمیو زمانا پرکوسپو زوندرانو چے غورو سیدان ادرخو سورا ایغو دیرو برانی۔ باردوخ بوہرت اوچے اورینی ہے ایغو دکا استعمال بیرو برانی ۔ ہتے جنگا کھاڵ ویلٹی بو روۓ ځخمی بیرو برانی۔ ځخمیان موژہ مہ تت دی براۓ۔ ہتے جنگار زروٹھی ځخمیان گانی انگِک مہ یاد بوۓ۔ اوا تان برارگنی اسپسارگینیان سُم ای بتی استانہ روپھی ہتیتان لوڑتم۔ ای شٹ موژو بورنتو ہاۓ وا ای شٹتوری گنزولین ہاۓ۔ اسپہ ہتو سگینیو ہُش نو ارتم۔ مہ تت دی بو خطرناک ځخمی بیرو براۓ۔ ہتو کپالو فروسکیو ویلٹی بوہرت توریرو براۓ۔ ہیس تنہا قصہ، تتو زندگیو سورہ نویشیرو"چارغیریو لال"  نمو سورا کتابو موژو ذکر بتی شیر۔ کم مودو موژی چاپ بوئے۔ اوا تان تتوتے ہیہ لوو دکو ہسے حیران بتی ریتۓ، "اے ژاو تو ای سالہ یا ای سالو چے پھت بیرو بوس تہ کیچہ ہردی گوین؟کیہ  پتیکو بش لو نو"                                                                                               مہ پھوکیو اشٹوکو ملگیرین موژی مہ تان موژغیشٹی تاتیو ژاو بلبل صاحب خان مہ سار پُھک رو لوٹ اوشوۓ۔ مہ بو خوش برار اوشوۓ۔ ہسے دی مہ بو خوش دراٷر۔ سوتو جماعتہ سبق راوا ہیضو لہازیہ  خدایو حقوتے تورتۓ۔ ہنیسے دی مہ ہردیی کہ ہاۓ مہ ہردیا ای باس بیرو غون سریئر۔ اسپہ ای نسیرو میکیو ژاو شپیر وا ای خور میکیو ژاو غلام مہ اشٹوکو یاران اوشونی۔ ہتیت کھاڑ بے وخت اوبریتانی۔

 ڑاسپریک نن میر بیاز لالو نن اسپہ بو خوش دراٷر۔ اسپہ انوسی ای دفعہ ہتو دورتو بوغاوتم۔ ای دفعہ باتم کہ ڑاسپریک نن نیکی۔ زیربلی تت کیہ کوروم کوین۔ ہسے ترکان اوشوۓ۔ اسپہ تو سار بشار گانتم "اے تات تہ نن کوۓ بی اسور؟" زیربلی تت المعروف نشایٴ ریکی۔ "مہ نن اوبریتۓ"۔ اسپہ ایتو دیتی ژریغ کوری کیڑتم۔ ڑاسپریک ننو کارہ دیتی دے ہاۓ۔ "اے مہ اژیلین کیانی ارو؟" نشایٴ تت ریکی "ہمیت مہ سار خبار گانیتانی۔ اے تات تہ نن کوۓ بی اسور؟ اوا ریتم مہ نن اوبریتۓ۔ ہے لوا ہمیت کیڑینین"۔ ہرونی نافہم بیریتم کہ ڑاسپریک ننو نشائی تتوتے نن کوراوا بیریتم۔

ای خور واقعہ دی مہ سار روخڅونو نوبوین۔ ای گدیری کیمیری کورار ہاۓ وا موژو دیہو توری گنځولو بار بار موژہ نشی انوس چھاغ دیکا پت وا چھونگ روشت دیکا پت ݰا ہواز نیےٴ قوژد کوری کڑیکا پراۓ۔ روین زندگی تروق ہوۓ۔ اسپہ څیڅیق بوہرتی بوہرتی دورار بیری نسیکار باتم۔ ہے گنځولین روۓ کوسیکار بغانی۔ ہیش کا دی ہتو ݰویی بکو ہمت نو ارینی۔ اسپہ دوروتے ݰویی بکین اسپہ زیادہ بیزار ہوتم۔ ہرونیا سے کما بس اچہ اوشوۓ مہ ہردی نو گوین، مہ موژغیشٹی تاتی میر صاحب خان ہمت کوری تان جو نویسگینین اقبال خانو چے زمرادو گانی استورو ہون دیتی ہتے گدیریو نسوتے بغۓ۔ ہیتیت کیہ کوری ہتو قابو کوری استورو سورو نیشتانی۔ تاتی توغو بیارہ نشی  څاداروسورا تان سُم بوتی مستوچوت گانی اواۓ۔ تھ اسپہ ژن خلص ہوئے۔   جاری شیر۔